1764. La kompozisto Jean-Philippe Rameau mortis, evante 80 yari. En lua frua kariero il esis orgenisto; il kompozis moteti e verki por klavikordo. De 1722 il rezidis en Paris. En 1733, kande il evis 50 yari, ilua unesma opero, Hippolyte et Aricie esis unesmafoye pleata; ol esis egardata kom la maxim importanta opero depos la morto di Jean-Baptiste Lully. Plusa operi sequis, ed il divenis la precipua kompozisto di Franca operi di la baroka periodo.
1910. En München, la Simfonio no. 8 da Gustav Mahler esis unesmafoye pleata, direktata da la kompozisto. La verko postulas granda orkestro, du adulta kori ed un koro de yuni, e sis kantisti. La unesma de la du parti traktas 9ma-yarcenta himno por Pentekosto, Veni creator spiritus; la duesma parto traktas la lasta ceno di Faust da Goethe. La pleado esis bona recevata. Ol esis la lasta de la simfonii di Mahler qui esis pleata dum ilua vivo.
1940. La kaverno ye Lascaux, en sud-westala Francia, qua kontenas multa pre-historiala pikturi, deskovresis da quar yunuli e lia hundo. En 1948 ol esis unesmafoye apertata por publika regardo. La pikturi facesis forsan cirkume 17 000 yari ante nun; la plu multa montras animali exemple kavali, cervi e bizoni. La kaverno esis klozata en 1963 pro dicernebla domajo di la imaji konsequante di la respirado di la vizitanti; aceso pose esis restriktata a kelka vizitanti dum semano. Pos la instalo di aero-regulozigili en 2001 esis kresko di ulsorta moldi, pri quo nuntempe esas desquieteso.
