Gustav Mahler

De Wikipedio
Irez ad: pilotado, serchez
Gustav Mahler
Gustav Mahler 1909.jpg
Profesiono: kompozisto
Lando: Flag of Austria.svg Austria
Naskodato: 7 di julio 1860
Nasko-loko: Kalischt, Austrian imperio (nune Chekia)
Mortodato: 18 di mayo 1911
Morto-loko: Wien, Austria

Gustav Mahler (1860 til 1911) esis Austriana kompozisto e muzikala direktisto.

Dum ilua vivo il esis notinda direktisto di operi. Il anke kompozis plura granda simfonii qui esis influiva ed esas durante famoza.

Simfonii[redaktar | redaktar fonto]

Ilua Simfonio no. 2 esis unesmafoye pleata en kompleta versiono en Berlin ye la 13ma di decembro 1895, direktata da la kompozisto. Ol divenis sucesoza dum la vivo di Mahler. Il kompozis l'unesma de la kin movimenti en 1888 kom separita verko; il plu tarde decidis skribar plusa movimenti. La lasta movimento, qua duras plu kam mi-horo, inkluzas koro, qua kantas versi de la poemo Die Auferstehung (La Rivivigo) da Friedrich Gottlieb Klopstock, e plusa versi skribita da Mahler. La simfonio, nomizita la Rivivigo-simfonio, duras cirkume 90 minuti.

Ilua Simfonio no. 5 esis unesmafoye pleata ye la 18ma di oktobro 1905 en Köln, direktata da la kompozisto. Il komencis kompozar ol dum somero 1901 ye ilua vakancala dometo ye Maiernigg en Karintia, Austria, ed ol esis kompletigata en 1902. Dum ta periodo il renkontris Alma Schindler, e li esis mariajata en marto 1902. La simfonio havas kin movimenti: la unesma esas funero-marcho; la quaresma esas la famoza adagietto por harpo e kordeti, kontrastanta a la altra movimenti; la lasta esas joyoza ed orkestrale komplexa konkluzo.

Ilua Simfonio no. 8 esis unesmafoye pleata ye la 12ma di septembro 1910 en München, direktata da la kompozisto. La verko postulas granda orkestro, du adulta kori ed un koro de yuni, e sis kantisti. La unesma de la du parti traktas 9ma-yarcenta himno por Pentekosto, Veni creator spiritus; la duesma parto traktas la lasta ceno di Faust da Goethe. La pleado esis bona recevata. Ol esis la lasta de la simfonii di Mahler qui esis pleata dum ilua vivo.

Lasta semani[redaktar | redaktar fonto]

Ye la 21ma di februaro 1911 il direktis sua lasta koncerto, en Carnegie-halo, New York. Il direktabis koncerti ed operi en New York depos januaro 1908, retrovenante singla-somere ad Europa. Il esis malada dum la lasta koncerto, e pose esis enlitigata dum kelka semani. La maladeso relatis ilua debila kordio. Ye la 8ma di aprilo Mahler e familio departis de New York, voyajante ad Europa. Il mortis ye la 18ma di mayo, kelka dii pos arivo en Wien.