Shablono:Eventi/7 di decembro

Eugene Cernan de Apollo 17 vehar sur la Luno

• 43 aK. La Romana filozofo e politikisto Cicero asasinesis. Pos la morto di Iulius Caesar en 44 aK, Antonius esis chefa parolanto por la partiso di Cezaro; Cicero, qua nultempe esis amiko di Antonius, e qua pensis ke Antonius false reprezentas la intenci di Cezaro, atakante parolis kontre Antonius, e suportis Octavianus (qua plu tarde esis imperiestro Augustus). Kande Antonius ed Octavianus rikonciliis su, Cicero e lua suportanti divenis enemiki di la stato; quankam multi refuzis revelar la loko di Cicero, il fine trovesis ed ocidesis da du asasinanti, dum ke il livis sua domo intencante voyajar a Macedonia.

• 185. La supernovo SN185 esis vidata. Ol observesis da Chiniana astronomi, qui deskriptis ol kom "gasto-stelo"; ol restis videbla en la cielo dum ok monati. Ne quale altra "gast-steli", t.e. kometi, ol ne rapide progresis trans la cielo. Co esis la maxim frua konocata observado di supernovo. La nuna gasoza shelo RCW86 probable esas la restajo di ca supernovo. Olua disto esas cirkume 9100 lumo-yari. Recenta studiado di la radiado di RCW86 montras ke ol havas evo qua semblas konfirmar ke ol esas SN185.

• 1972. Apollo 17, la lasta spaconavo en qua homi voyajis a la luno, esis lansata. La navo portis Eugene Cernan, Ronald Evans e geologo Harrison Schmitt; Cernan e Schmitt arivis ye la surfaco di la luno ye la 11ma di decembro, dum ke Evans esis en orbito cirkum la luno. La du facis tri exkursi per specala vehilo, dum qui li kolektis specimeni di petro e facis altra taski; singla exkurso duris cirkume sep hori. La tota disto di voyajado en la vehilo esis 35,9 km; la maxim granda disto de lia navo esis 7,6 km. Li livis la luno ye 14 di decembro, e li arivis retroe ye Tero, en la suda Pacifiko, ye 19 di decembro.