Uzanto:DavidW/eventi1
dum agosto
50, 100 ed 800 yari ante nun …
8 di agosto 1974. Richard Nixon, en diskurso transmisata a la naciono de la Blanka Domo, anuncis ke il demisionos kom Prezidanto di Usa; il esis la unika prezidanto qua demisionis. Pro la Skandalo di Watergate, proceso di statala akuzajo esis expektata; en lua diskurso, il dicis ke il ne havus la politikala susteno por traktar la devi di ilua ofico en la maniero bezonata da la interesti di la naciono. Ye la morga dio il sendis letro di demisiono a la Sekretario di Stato Henry Kissinger, e la vice-prezidanto Gerald Ford pose divenis Prezidanto.
23 di agosto 1924. La planeto Marso atingis proximeso 55.730.000 km a Tero, la minima disto depos 18 agosto 1845. Ye tala okazioni, la suno, Tero e Marso esas en rekta lineo. Curtis Wilbur, Sekretario di la Usana milit-navaro de 1924 til 1929, kredis ke to esus apta okazionio por saveskar ka Marsani probas komunikar kun Tero per radio-transmisi: il sendis komando a navala kustala stacioni, ke de 21 agosto til 24 agosto li devas raportar irga ne-kustumala signali. Dum plura antea yardeki, multa personi, inkluzante la astronomo Percival Lowell, kredabis ke inteligenta enti vivis sur Marso, ed esis spekuladi ke komuniki per radio forsan esus posibla. Tamen, nula signali de Marso esis raportata.
3 di agosto 1224. En Francia, la siejo di La Rochelle finis. La Capet-dinastio, qua rivalesis kun la Plantagenet-dinastio por regno di la regiono Poitou, komencis siejar la strategiala portuo ye 15 julio. Depos 1203, kande la Franca rejulo Philip II, di la Capet-dinastio, deklaris ke John di Anglia havas nula yuro pri landi en Francia, konflikto existis inter le Capet e le Planagenet. En La Rochelle esis garnizono di lokala homi ed Angliani; kande helpo de plusa Angliani faliis aparar, la garnizono cedis a la Franca komandanto, Louis la 8ma. Pos ca vinkeso, Gaskonia esis la unika parto di Francia regnata da le Plantagenet.