Uzanto:DavidW/eventi2
dum junio:
50, 100 e 200 yari ante nun …
4 di junio 1974. En Usa, konstruktado komencis di la unesma spaco-paromo, nomizita Enterprise por la fiktiva spaco-navo en la TV-serio Star Trek. Ol esis kompleta en septembro 1976. Probadi di la navo sequis, unesme sur aeroplano modifikita por portar paromo, e pose flugante sole. La intenco esis ol pose esus equipata por atingar orbito cirkum Tero (nam ol ne ja havis motoro o varmeso-shildo), ma la desegno chanjis dum la konstruktado di la unesma paromo en spaco, Columbia. Plusa modifiko di Enterprise esabus tro kustoza; vice to, nova Spaco-paromo Challenger konstruktesis. Depos 2012, Enterprise esis publike videbla en muzeo di militala e navala historio en New York.
8 di junio 1924. George Mallory and Andrew Irvine, acensante Monto Everest, lastafoye videsis kande ili esis cirkume 240 vertikala metri de la somito. Li esis du de la dek-e-du membri di Britana expediciono di 1924 por acensar Everest. La probo di Mallory ed Irvine por atingar la somito, komencante ye 4 di junio, esis la triesma probo da membri dil esquadro. Pos ke li videsis ye 8 di junio da altra membro, qua studiis la geologio ye plu basa nivelo, Mallory ed Irvine desaparis aden nubii, e nultempe pluse esis vidata. L’expediciono pose abandonesis. La kadavro di Mallory deskovresis en 1999, dum expediciono por trovar ilia restaji; la kadavro di Irvine ne esas trovita.
23 di junio 1824. En Altona, nuntempe parto di Hamburg, tatempe en Dania, la pianisto e kompozisto Carl Reinecke naskis. Il unesme koncertis evante dek-e-du yari, e facis koncerto-turi en 1843 en Dania e Suedia. Il pose rezidis en Leipzig, studiante kun Mendelssohn, Schumann e Liszt. En 1851 il divenis profesoro ye la Konservatorio di Köln; en 1860 il divenis profesoro di piano e kompozado ye la Konservatorio di Leipzig, e til 1895 esis direktanto di la Gewandhausorchester Leipzig. Il retretis de la konservatorio en 1902. Il kompozis quar piano-koncerto-peci, tri simfonii e multa altraji. Il mortis en Leipzig en 1910.