Venice (Los Angeles)

De Wikipedio
Irez ad: pilotado, serchez
Venice, Los Angeles

Venice esas rezidala, komercala ed amuzala marbordala vicineyo en la urbo Los Angeles, Kalifornia, situita en la regiono Westside.

Venice fondesis en 1905 kom marbordala vakanco-urbo.  Ol esis nedependanta urbo til 1926, kande ol kombinesis kun Los Angeles.  Hodie, Venice konocesas pro sua kanali, plaji, la cirkatra Ocean Front Walk, du-e-duima-milia nur-pediranta promeneyo ube trovesas pleeri, mistiki, artisti e venderi.

Historio[redaktar | redaktar fonto]

Venice, originale nomizita "Venice of America" (Venezia di Usa), fondesis dal tabako-milioniero Abbot Kinney en 1905 kom plajala vakanco-urbo, 23 km weste de Los Angeles.  Lu e lua partenero Francis Ryan komprabis 3,24 km de apudoceana imoblo sude de Santa Monica en 1891.  Li konstruktis vakanco-urbo ye la norda extremajo dil domeno, nomizita Ocean Park, qua balde anexesis a Santa Monica.  Pos la morto di Ryan, Kinney e lua nova parteneri pluduris konstrukto sude de Navy-strado.  Pos la dissolveso dil partenereso en 1904, Kinney, qua ganabis la marshatra tereno ye la suda extremajo dil domeno per moneto-lotrio kun sua olima parteneri, komencis konstruktar marbordala vakanco-urbo segun la stilo dil samnoma italiana urbo (Venezia).

Kande Venice of America apertesis ye julio 4ma, 1905, Kinney exkavabis plura milii de kanali por drenar la marshi por sua rezidala areo; konstruktis 370 m-longa plezuro-"pier" kun audochambro, navo-restorerio, e danso-chambro; konstruktis varmega salaqua plunjeyo, e blok-longa arkadizita komercala strado kun Veneziana arkitekturo.  Turisti, grandaparte arivinta per la "Reda Vagoni" di la Pacifika Elektrala Fervoyo de Los Angeles e Santa Monica, lore vehis la Miniatura Fervoyo di Venice e gondoli por tra-turar la urbo.  Ma la maxim granda atraktivo di Venice esis la milio-longa inklinetanta plajo.

Gondolo sur kanalo en Venice, 1909

La habitantaro (3119 rezidanti en 1910) balde ecesis 10.000; la urbo atraktis 50.000 til 150.000 turisti dum semanfini.

En 1925, la politiko di Venice divenabis nejerebla.  Lua stradi, aquo- e kloako-sistemi bezonegis repareso ed expanso pro la kreskanta populo.  Kande on propozis ke Venice anexesez a Los Angeles, la fideikomisarii votis por elekto.  Anexo aprobesis per la elekto en novembro 1925, e Venice formale anexesis a Los Angeles en 1926.

Los Angeles anexabis la Disneylando ta-epoka e rifacis Venice segun sua propra imajo.  On sentis ke la urbo bezonis plu multa stradi - ne kanali - e la maxim multa pavizesis en 1929 pos tri-yara legala lukto duktita da kanal-rezidanti.

Los Angeles neglijabis Venice tante longe ke, en la 1950a yari, ol divenabis la "Quarteracho an la Maro".  La urbo spensis poke ye plubonigi pos anexo.  La urbo pavizis Trolleyway (Pacific-avenuo) erste 1954 kande komtio- e stato-pekunio disponesis.  Basa lokacopreci di kaduka bungalow-i atraktis precipue europana enmigranti (inkluzante transvivanti dil Holokausto) e yuna kontrekulturo-artisti, poeti, e skriberi.  La Beat-Generaciono kunvenis che la Gas House ye Ocean Front Walk e che Venice West Cafe ye Dudley.  Polico-inkursi esis frequa dum ta epoko.

Geografio[redaktar | redaktar fonto]

Venice adjacas nordweste Santa Monica, nordeste Mar Vista, sudeste Culver CityDel Rey e Marina Del Rey, sude Ballona Creek e weste la Pacifika Oceano.