Adriano Romero Cachinero

Adriano Romero Cachinero
Profesiono:	laboristo, politikisto, sindikalisto
Lando:	Hispania
Naskodato:	1901
Nasko-loko:	Villanueva de Córdoba
Mortodato:	1979
Morto-loko:	Paris, Francia

Adriano Romero Cachinero kun sua fratuli esis socialisti qui dum yunevo en 1918 fondis Asociuro di Socialista Yuni. En 1920 lu adheris l'unesma komunista grupi qui fondis en 1921 la Hispaniana Komunista Partiso.

Kom yunulo il komprenis la problemi di interkomunikado inter l'internaciona proletariaro e decidis lernar Ido. En 1927 il fondis yunarala grupo a qua il docis Ido-linguo a non yuni.

Ilua kariero en la komunistala movemento acensis pos ke il trovis laboro en cement-fabrikerio en Kordoba ed en 1930 fondis la Sindikato di Konstruktisti. Sucesoze il luktis (mem kombatis) por la yuri di laboristi e plu bona salarii.

Da la komunista partiso il sendesis a Moskva por esar instruktata politikale. Retroveninte en 1936 il elektesis kom deputito di la Populala Fronto aden la Hispaniana Parlamento. Dum la komenco di la Hispana Interna Milito il sucesis kun Lina Ódena, altra importanta membro di la komunista partiso, haltigar la rebela trupi apogata dal italiana fashisti.

La fashisti di Hispania vinkis l'interna milito di Hispania ed Adrian Romero kondamnesis a morto, unesma foyo en Ciudad Real, ube la puniso reduktesis, e duesma foyo en Granada, ube on ne exekutis la kondamno.

De 1940 til 1946 il pasis en karcero, ube il povis riorganizar la komunista partiso. Pos ekirir la karcero il fugis a Francia.

Fidel a la komunismo di Soviet-Uniono il kritikis l'eurokomunismo di Santagio Carillo, l'olima prezidanto di la Hispaniana Komunista Partiso.