Biciklago en København
Biciklago en Dania – partikulare en København – esas importanta transporto-moyeno e dominacanta parto dil urb-aspekto, ofte remarkata da la vizitanti. La urbo ofras diversa facilesi por bicklago - densa urbana proximesi, kurta disti e plata tereno - ultre vasta bone-desegnita sistemo de biciklo-voyi. Per to ol ganis reputeso kom un ek la maxim biciklo-afina urbi dil mondo.
Omnadie homi biciklagas 1,2 milion kilometri en København, e 36% del urbani vehas a la laboreyo, skolo od universitato per biciklo, preske tam multa kam en tota Usa. Biciklago ordinare konsideresas kom plu sana, verda, chipa ed ofte rapida veho-moyeno kam publika transporto od automobilo.
Bicikli populareskis en København ye la komenco dil 20ma yarcento. La unesma biciklo-voyo establisesis che Esplanaden en 1892; altra frua exemplo esas la voyo cirkum La Lagi en 1910. En 1890 esis 2.500 bicikli en la urbo, nur 17 yari plu tarde ta nombro augmentabis til 80.000. Dum la yari 1920ma e 1930ma lua populareso itere augmentis.
Biciklo-substrukturo en København nune inkluzas cirkume 350 kilometri de separata biciklo-voyi, 23 kilometri de en-strada biciklo-voyi, e 43 kilometri de ek-strada verda biciklo-voyi tra parki ed altra verda arei. La urbo projetas expansar ico per 70 kilometri de biciklo-voyi e 67 kilometri de verda biciklo-voyi ante 2026 por kompletigar la reto.