Choseo Dutra

De Wikipedio
Mapo pri la choseo Dutra, inter l'urbi Sao Paulo e Rio de Janeiro.
Choseo Dutra en São José dos Campos.

La choseo Presidente Dutra o simple choseo Dutra (Portugalane: Via Presidente Dutra o Via Dutra) esas choseo longa de 402 km inter la du maxim populoza urbi di Brazilia, Sao Paulo e Rio de Janeiro. Ol inauguresis ye la 19ma di januaro 1951 e recevis ta nomo memoriganta la prezidanto Eurico Gaspar Dutra, qua guvernis Brazilia dum ta epoko. Lua voyo duopligesis en 1967. Antee, altra anciena choseo inaugurita en 1928 e nun konocata kom Estrada Velha São Paulo-Rio, ligis la du urbi.

Choseo Dutra inter l'urbi Taubaté e Pindamonhangaba.

Depos lua inauguro, choseo Dutra stimulis ekonomiala rekupero di la regiono konocata kom Valo dil fluvio Paraíba do Sul. Nun ol ank esas la precipua choseo qua ligas la sudo di Brazilia kun lua sud-estala e nord-estala regioni. La maxim multa komercaji transportata de norde til sude di Brazilia ed inverse, anke cirkulas tra ta choseo.

La choseo Dutra nun trairas importanta industrial urbi, di qui la precipua esas Guarulhos, São José dos Campos, Taubaté, Resende, Volta Redonda e Nova Iguaçu.

Pas-pago en Choseo Dutra exploresas da la privata kompanio NovaDutra S/A, qua anke esas responsebla por la konservo di la choseo. Existas 6 pordi di pas-pago en ol.