Frida Kahlo
| Frida Kahlo | ||
| ||
| Profesiono: | piktisto | |
| Lando: |  Mexikia
| |
| Naskodato: | 6 di julio 1907 | |
| Nasko-loko: | Coyoacán, Mexikia | |
| Mortodato: | 13 di julio 1954 | |
| Morto-loko: | Coyoacán | |
Magdalena Carmen Frida Kahlo y Calderón (1907-1954) esis notora Mexikiana piktisto, mariajita kun la Mexikiana piktisto Diego Rivera.
Vivo
[redaktar | redaktar fonto]Ye la 6ma di julio 1907 Magdalena Carmen Frida Kahlo naskis en Coyoacán, ula preurbo di Mexiko. Frida havis du plu olda fratini ed un plu yuna. Matilde, Adriana, Frida e Cristina edukesis en la “Blua Domo” en Coyoacán. Evante sis yari Frida maladeskis de poliomielito. Un jambo restis plu kurta kam l’altra, quon plu tarde el celis sub lua longa robi. Frida esis maxim inteligenta puerino. Pos la skolo el volis studiar medicino. Elu esis un dil unesma mulieri, qui darfis frequentar un di la maxim bona skoli di Mexikia. Antee la vizito di ca skolo esis permisita nur a viri.
Ma en la yaro 1925 Frida subisis grava fato-stroko: el havis grava trafik-acidento, dum qua lua spino ruptesis. Dum multa monati el mustis restar en lito. Dum ta tempo el komencis piktar por supresar la doloro e l'enoyo. Sur lua lito on pozis granda spegulo, tale ke el povis piktar su ipsa. Dum la tota vivo Frida mustis sufrar del efekti dil acidento. Sencese el operacesis – sen suceso.
Kande Frida risaneskabis tale, ke el itere povis vivar pasable normale, el konoceskis Diego Rivera, qua esis plu olda de duadek yari kam el. Il esis ja famoza piktisto. Frida montris sua unesma pikturi a lu. Il esis tre impresata da la yuna muliero e lua talento. Diego e Frida amoreskis l'una en l'altra ed en la yaro 1929 li mariajis su. Li tre deziris filio, ma Frida ne povis parturar filii. En la yaro 1930 la gespozi translojis aden Usa. Ibe Diego devis piktar granda murala pikturi. Tamen Frida nultempe sentis su hematre en Usa, ed el deziregis a sua patrio. Erste en la yaro 1933 li retro-vehis a Mexikia. Frida e Diego ofte disputis l’una kontre l’altra. Ye la fino di la yaro 1939 li divorcis. Tamen un yaro plu tarde li mariajis duesmafoye en San Francisco.En la yaro 1941 la patro di Frida mortis. Diego e Frieda trans-lojis aden elua nasko-domo: la “Blua Domo” en Coyoacán. Frida komencis docar ye ula art-skolo. Tamen pro lua mala stando sanesala pos kurta tempo el ne plus povas irar a la skolo. Pro to la dicipuli venis a lua hemo. Frida operacesis omno kalkulite sep-foye ye lua vertebrala kolono. Tamen lua stando ne pluboneskis. Preske sempre el mustis sidar en la rulanta stulo, ed esis ofte tro febla por piktar. Intertempe Frida esis konocata piktistino. 1953 eventis l’unesma expozo di lua pikturi en Mexiko. Quankam el esis grave malada, el transportigis su en lua lito al inauguro dil expozo. Dum la yaro 1954 Frida Kahlo maladeskis de ula grava pulmonito. El mortis ye la 13ma di julio. Multa centi de homi venis a lua sepulto. Lua domo, la “Blua Domo” en Coyoacán, esis 1958 apertita kom muzeo.
| Ica pagino uzas kontenajo de la revuo Ido-Saluto! numero 3/2010, publikigita sub la Creative Commons Licence 2.0. |