Hanoi

De Wikipedio
Salti al navigilo Irez a serchilo
Hanoi
Panorama of Hanoi.jpg
L'urbo Hanoi
Lando: Flag of Vietnam.svg Vietnam
Informo:
Latitudo: 21°2' N
Longitudo: 105°51' E
Altitudo: 19 m
Surfaco: 3 328,9 km²
Habitanti: 7 587 800 (2015)
Denseso di habitantaro: 2.300 hab./km²
Mapo:
Mapo di Hanoi
Oficala retosituo:
www.hanoi.gov.vn
Mulieri kun tradicionala vestari en Hanoi.

Hanoi esas la chef-urbo e la 2ma maxim populoza urbo di Vietnam. Segun statistiki de 2015, ol havis 7 587 800 habitanti. Lua tota surfaco esas 3 328,9 km².

Ol fondesis cirkume 43 dal Chiniani. Komence ol nomizesis Long Biên (龍邊, bordo dil dragono) e pose Tống Bình (宋平, "paco dil (dinastio) Song"). Lua nuna nomo devenas del Chiniana frazeto signifikante 'interne di rivero'.

Historio[redaktar | redaktar fonto]

Hanoi habitesas de adminime 3000 yari aK. En 197 aK, ol anexesis dal rejio Nanyue, qua okupis parti de nuna Vietnam e de la provinci Guangdong, Guangxi ed Yunnan. En 1010 ol divenis chef-urbo dil rejio Đại Việt, e til 1802 ol esis la maxim importanta politikala centro di Vietnam. En 1873, Franci konquestis l'urbo. De 1883 til 1945 ol divenis l'administrala centro di Franca Indochinia.

De la 2ma di septembro 1945 til la 2ma di julio 1976 ol esis chef-urbo di Nord-Vietnam.

Geografio[redaktar | redaktar fonto]

Satelital imajo pri Hanoi.

La reliefo di Hanoi esas partale plana, e l'altitudo ordinare diminutas denorde adsude, e deweste adeste. Ol jacas an la delto dil Reda fluvio e distas cirkume 90 km de la litoro. Zoni kolinoza e montoza jacas norde ed weste de la urbo. La maxim alta punto (monto Ba Vi) jacas weste del urbo, 1281 metri super la marala nivelo.

La klimato di Hanoi esas humida subtropikala (Cwa segun la klimatala klasifikuro da Köppen) kun quar sezoni klare definita. Somero iras de mayo til agosto, ed esas varma e pluvoza sezono. Septembro til oktobro esas autuno, kande la temperaturi e la pluvozeso diminutas. Vintro iras de novembro til januaro, ed esas kolda e sika kompare l'altra epoki. Februaro e marto esas printempo, kande l'atmosfero esas multe nuboza ed existas poka sunala lumo dum la dii. La mezavalora temperaturo en julio esas 29,2°C, dum ke la mezavalora temperaturo en januaro esas 16,5°C.

La mezavalora yarala pluvo-quanto esas 1676,2 mm, e la maxim pluvoza monato esas agosto, kun mezavalore 318 mm. De decembro til februaro la monatala pluvozeso esas infre 25 mm.

Moderna edifici an la westala quarteri di Hanoi.