Hip hop

De Wikipedio
Irez ad: pilotado, serchez
En l'edifico 1520 de l'avenuo Sedgwick DJ Kool Herc komencis plear en muzikala bali dum la 1970a yari.

Hip hop, anke Hip-hop o muziko rap esas muzikala jenro qua konsistas ek ritmala muziko akompanita da rimanta parolado, konocita en Angla kom rap. La jenro developis kom parto di la "kulturo hip hop", qua inkluzas quar elementi: la verko di "disk-jokei", la danso konocita kom breakdance, l'uzo di scratch (la fono produktita kande ulu prenas un disko di muziko sub l'agulo di un turno-tablo e turnas ol rapide dope ed avane), e la graffitti (desegno di koloroza imaji o letri en muri, vehili, edifici, edc). L'uzo di Beat Box multafoye konsideresas "la 5ma elemento" di la "kulturo hip hop".

Ta "kulturo" e muzikala jenro aparis dum la 1970a yari e gradope divenis populara, komence en New York, inter la grupi di Afrik-Amerikani. En la muzikala bali, disk-jokei pleis muziki kun forta perkuto, ed ofte uzis du turno-tabli por mixar ed extensar la muziki. La jenro evolucionis pos l'uzado di elektronikala perkut-ensembli, sampler-i (la registro di mikra parto de parolado e de altra muziko por uzar en la muziko pleata), vocoder-i e "parolo-buxi", qui deformis la fono di la voco e produktis la konocita "voco di roboto".

La vorto "Hip" en l'Angla slango uzata per Afrik-Amerikani signifikas 'koza moderna', od 'ulo qua eventas nune', dum ke "Hop" referas a la movo di la danso. On konsideras ke Keith "Cowboy" Wiggins e Grandmaster Flash uzis la frazo hip hop unesmafoye en 1978, e samatempe Grandmaster Flash provokis un amiko lia qua eniris Usan armeo, dicante "hip/hop/hip/hop" por simular la ritmo di soldati en marcho.[1] Pose, "Cowboy" Wiggins determinis ta kadenco kom ritmala refero por la muziko.[2]

Un di la pioniri di hip hop esis la grupo The Sugarhill Gang, kun lua muziko "Rapper's Delight". Ca muziko kreesis super muzikala harmonio di la kansono "Good Times", de la grupo Chic. Li repetis la muzikala bazo de "Good Times" e deklamis lia rimi dum plu kam 14 minuti, en l'originala enrejistro. Altra pioniro esis Jamaikana disk-jokeo DJ Kool Herc, qua komencis plear la muziki di James Brown dum la 1970a yari, kun emfazo en la ritmo.

L'uzo di rap[redaktar | redaktar fonto]

Rap (pronuncez "rep") esas deklamo di poezio en ke l'artisto parolas e rimas segun ritmo markizita da instrumentala bato. La bati, ofte en ritmo 4/4 povas kreesar da elektronikala equipuri o da la nomizita sampling, qua esas la kopiuro di mikra porciono dil fono di altra muziko e lua itero multafoye en ritmala sequo. L'artisti povus skribar, memorigar o improvizar lua rimi, e parolar sen muziko o sequante la kadenco di un muziko.

La kansoni "Rapper's Delight" da The Sugarhill Gang e "Superrappin", de Grandmaster Flash lansesis en 1979 ed obtenis granda suceso. Du yari pose, la disk-jokeo Lovebug Starski, de Bronx, lansis disko kun la muziko "The Positive Life", qua mencionis rappers, la kantisti qui deklamis rap-i. Pose, DJ Hollywood uzis la vorto rap por nominar ta stilo di muziko.

La muziko hip hop precedis l'aparo di rap en la nomizita "kulturo hip hop", e kelka muziki hip hop ne havas poemi rap, exemple "Hip Hop, Be Bop (Don’t Stop)" da Man Parrish, "Destination Earth" da Newcleus, e "Al-Naafiysh (The Soul)" e "We're Rocking the Planet" da Hashim. Tamen, la maxim multa exempli di hip hop kontenas kantado rap en lua liriki.

Ultre la grupo The Sugarhill Gang, artisti quale DJ Hollywood, Kurtis Blow, Spoonie Gee e la grupo Funky Four Plus One (Funky 4 + 1) lansis l'unesma sucesi rap. Femina trio The Sequence e la kantistino Sha Rock, de la grupo Funky Four Plus One, esis l'unesma mulieri qui obtenis suceso kun la muziko rap.

La danso Break[redaktar | redaktar fonto]

Dansisto di Break en San Francisco.
Dansisto di Break

Breakdance o simple Break esas stilo di danso qua originis en la komunesi di Portorikani e Afrik-Amerikani en New York e pose en altra urbi di Usa. Ol ganis populareso en tota mondo, note en la granda urbi di Anglia, Kanada, Japonia, Francia, Germania e Rusia. Lua movi kelkafoye semblas akrobatala o tordala spektakli, quale jirar kun la kapo en la pavimento e la gambi movante quale ventomuelilo.

Break dansesas kun muziki funk ed specale hip hop, e la danso esas parto di la nomizita "kulturo hip hop".

Beat Box[redaktar | redaktar fonto]

La frazo Beat Box (literale de Angla: "buxo por perkuto") kreesis por nominar foni produktita kun la boko por simular od imitar la fono di perkut-instrumenti quale tamburi o cimbali, od elektronikala sintezilo, o la fono di scratch (produktita kande ulu prenas un disko di muziko sub l'agulo di un turno-tablo e turnas ol rapide dope ed avane). Quankam ne esas obliganta uzar beat box en la muziki di jenro hip hop, ta "vocala tekniko" uzesis per kantisti quale Doug E. Fresh, e la trio The Fat Boys.

Graffitti[redaktar | redaktar fonto]

Bidono di tinto komune uzata en graffitti.

Graffitti esas la nomo en Angla por la desegni di koloroza imaji o letri en muri, vehili, edifici, edc. La desegni facesas kun tinti en bidoni spricigata kontre muri, vehili od altra solida surfaci, o kun tinti aplikata per pinseli. Ol konsideresas graffitti kande la kreado dil imajo intencas expresar ideo, quale altra arti.

La verko di disk-jokei[redaktar | redaktar fonto]

Komence responsebla por mixar ed unionar du o plua muziki pleita en turno-tabli kun elektronikala mixurili, nune la disk-jokei povas konsideresar anke "muzikisti", pro la posibleso di uzar scratch en la kompozo di muziki, e pro la developo di breakbeat, qua konsistas ek insertar ritmala bato super un muziko ja existanta, e la danso di breakdance o l'insterto di rimi di rap.

Referi[redaktar | redaktar fonto]

  1. '’JET, April 2007”, Johnson Publishing Company pp.36–37
  2. Keith Cowboy – The Real Mc Coy