Keukenhof

De Wikipedio
Salti al navigilo Irez a serchilo
Tulipi che Keukenhof

Keukenhof (lit: "legumo-gardeno"), anke konocata kom la Gardeno di Europa, esas un ek la maxim granda floro-gardeni dil mondo, situita en la urbo Lisse, Nederlando.

Segun olua oficala retosituo, Parko Keukenhof kovras areo de 32 hektari, e cirkume 7 milion floro-bulbi plantacesas en la gardeni yarale.  Dum ke Keukenhof esas maxime konocata pro sua tulipi, anke hiacinti, narcisi, lilioflori, rozi, dianti ed iridi esas videbla.

Kastelo Keukenhof

Keukenhof situesas en la provinco Suda-Holando, sude de Haarlem e sudweste de Amsterdam, en la "Regiono de Duni e Bulbi" (Ned: Duin- en Bollenstreek).  Ol esas acesebla per autobuso de la tren-stacioni di Haarlem e Leiden, ultre del aeroportuo Schiphol.

Keukenhof esas apertita dum nur 8 semani de meza-marto til meza-mayo.  La maxim bona tempo por vidar la tulipi esas cirkume meza-aprilo, ma to dependas de la vetero dum la kresko-sezono, qua varias de yaro a yaro.

En 2019, 1,5 milion homi vizitis Keukenhof.  Kompare, la Rijksmuseum recevas mezvalore 8000 vizitanti singladie, l'amuzo-parko Efteling recevas 14.000 vizitanti singladie ma Keukenhof recevas 26.000 vizitanti singladie.

Historio[redaktar | redaktar fonto]

Keukenhof situesas en la 15ma-yarcenta chaso-tereno dil kastelo Slot Teylingen ed anke esis la legumo-gardeno (Ned: keukentuin) por ta kastelo, provizinte la habitanti per abundanta fonto de vildo, frukti e legumi.  La maxim famoza rezidanto qua profitis per la provizuri de la legumo-gardeno esis Komtino Jacoba van Beieren (1401-1436).

En 1638, la domeno kompresis da kapitano e guvernisto dil VOC, Adriaen Maertensz Block, ed en 1641 il konstruktigis granda domego quan il nomizis Keukenhof, nun konocata kom Kastelo Keukenhof.

En 1857, Barono e Baronino Van Pallandt, qui proprietis la domeno tatempe, komisis la peizaj-arkitekto Jan David Zocher e lua filiulo Louis Paul Zocher (qui anke desegnis la Vondelpark en Amsterdam) ristrukturizar la parko e tereno cirkum la kastelo.  La parki, desegnita en angla stilo, esas ankore la fundamento di la gardeni hodie. Keukenhof quale ol esas nun, establisesis en 1949 da federuro de bulbo-kultiveri e flor-exportaceri por estalar sua produkturi e helpar la exportaco-industrio.  La gardeno unesme apertesis al publiko en 1950, ed esis quik populara, kun 20.000 vizitanti dum l'unesma yaro nur.

Turismo[redaktar | redaktar fonto]

Keukenhof esas un ek la maxim granda atraktivi di Nederlando, e cirkume 75% de la vizitanti venas ek exterlando.  Dum du monati ol recevas yarale 1,5 milion vizitanti.  20 procento del vizitanti venas de Nederlando, e 40 procento de Europa.  Pluse venas multa gasti ek Usa, Azia e Rusia.

Galerio[redaktar | redaktar fonto]