Lago Pontchartrain
Lago Pontchartrain (en la franca: Lac Pontchartrain) esas salozeta estuario situita en sud-esta Louisiana en Usa. Ol kovras areo de 1.600 km2 kun mezvalora profundeso de 3.7 a 4.3 m. Ula navo-voyi esas pluprofundigata per dragado. Ol esas quaze ovala, cirkume 64 km de westo ad esto e 39 km de sudo a nordo.
La lago esas situita en parti de sis komoni di Louisiana: St. Tammany, Orleans, Jefferson, St. John the Baptist, St. Charles, e Tangipahoa. La aquo-limiti definesis en 1979.
Lago Pontchartrain esas nomizita pro Louis Phélypeaux, komto di Pontchartrain de Pontchartrain-urbo. Il esis la franca Ministro di la Mari, Kancelero, e Financo-ministro dum la regno dil franca "Sun-Rejo," Louis la 14ma, pro qua la kolonio La Louisiane nomizesis.
Lago Pontchartrain ne esas vera lago ma estuario konektita al Gulfo di Mexikia per la Rigolets-stretajo e Chef Menteur-Paseyo aden Lago Borgne, altra lagunego, e do experiencas mareala chanjeti. Ol recevas fresha aquo del riveri Tangipahoa, Tchefuncte, Tickfaw, Amite, e Bogue Falaya, e de Bayou Lacombe e Bayou Chinchuba. Ol esas un ek la maxim granda marshi alonge la Gulfo-Marbordo di Nord-Amerika. Ol inkluzas plu kam 50.000 hektari de marshlandi, inkluzante decidua foresti e cipreso-marshi, plus komplexa mixuro de herbala marshi inkluzante fresha, meza e salozeta marsho.
Salozeso varias de pokega en la norda parto weste de Mandeville, til preske duime maro-salozeso en la esta parto proxim Interstate 10. Lago Maurepas, vera freshaqua lago, esas konektita kun Lago Pontchartrain weste per Paseyo Manchac. La Industriala Kanalo konektas la fluvio Mississippi kun la lago che Nov-Orleans. Bonnet Carré Spillway deviacas aquo de la Mississippi aden la lago dum inundi.