Louisiana

Louisiana Stato di Usa Strado Bourbon Street, en New Orleans. Chefurbo Baton Rouge Maxim granda urbo New-Orleans Oficala linguo o lingui: ne havas. De facto: Angla e Franca Surfaco 134 265 km² Habitanti Denseso di habitantaro 4 657 757 (2020) 40.5 hab./km² Guvernisto Jeff Landry (R) Fondita o kreita 30ma di aprilo 1812 Posto-kodexo abreviuro LA Horala zono UTC-6 (UTC-5 dum somero) Reto www.louisiana.gov

Louisiana esas Usana stato. Lu havas kom vicini Arkansas norde, Texas weste, e Mississippi este. Sude jacas gulfo di Mexikia. Segun la demografiala kontado di 2020, ol havis 4 657 757 habitanti.

Historio

Funerala kolino che Poverty Point.

Louisiana habitesis da multa indijena populi dum yarmili ante l'arivo dil Europani. L'arkeologiala komplexo di ter-amaso Watson Brake kun 11 kolineti konstruktita kom sepulturi datizesis de cirkume 3.500 yari aK, ed esas la maxim anciena arkeologiala komplexo trovita en la regiono, esanta plu evoza kam la piramidi de Egiptia. Cirkume 2 mil yari pose, tale nomizita "kulturo de Poverty Point" atingis lua kulmino cirkume 1500 aK, konstruktis ceremoniala kresti e ter-amasi, e kreis komercala e religiala centro, kun influo sur vasta regiono. Pose, tale nomizita "kulturo Tchefuncte" konstruktis ceramikal objekti.

Kande Europani arivis en Amerika, la regiono habitesis da populi Natchez e Taensa. L'unesma Europani en la regiono esis Hispani, qui arivis en 1528 kande Pánfilo de Narváez komandis expediciono por explorar la delto di fluvio Mississippi. En 1542, Hernando de Soto exploris la nordo e la westo di la regiono. Tamen, Hispani havis nula intereso pri la regiono dum cirkume 150 yari.

En 1682, Franca explorero Robert Cavelier de La Salle nomizis la regiono Louisianne, honore lora rejulo Louis la 14ma di Francia. L'unesma permananta kolonieto, Fort Maurepas, fondesis proxim la nuna Ocean Springs, Mississippi, en 1699. Lor, Franci ja konstruktabis faro en la regiono nomizita La Balise, o La Balize, por guidar navi qui trairis la fluvio. En 1715, Louis Juchereau de St. Denis establisis fuorto Fort St. Jean Baptiste (Natchitoches), l'unesma permananta kolonieto che valo di fluvio Mississippi.

En 1724, Franc administrado kreis lego nomizita Code Noir ("negra kodexo") kun skopo regulizar interago inter blanki e negri en sua kolonio Louisiana. Pos ke Usa kompris Louisiana la lego duris uzesar, exemple proskriptanta kruelaji kom puniso. Fuginta sklavi, nomizita maroons povis facile celar su en marshoza arei. La vorto maroon venis de Hispana cimarrón, qua signifikis "nedocila".

Kompro di Louisianne

Kande Usa kompris Louisianne en 1803, aceptesis ke sklavi povus sendesar a Louisiana tam facile kam esis posibla sendar li a vicino Mississippi, malgre ke to signifikis violaco kontre Usana lego. Malgre opozo da kelka politikisti, sklaveso duris, pro ke ol esis profitoza.

Louisiana divenis Usana stato ye la 30 di aprilo 1812. En 1838, eventis l'unesma parado di Mardi Gras en New-Orleans, qua esis la chef-urbo dil stato til 1849. Ca yaro, Baton Rouge divenis chef-urbo.

Louisiana esis sklavista stato. Segun la demografiala kontado di 1860, ol havis 331 726 sklavi; to esis 47% de lua habitantaro. Pro la forta ekonomial intereso pri mantenar sklaveso, Louisiana separis su dil Uniono ye la 26ma di januaro 1861, ed unionis su a Kunfederita Stati di Amerika. Tamen, la stato rapide vinkesis, e federala trupi kaptis New-Orleans ye la 25ma di aprilo 1862. Louisiana itere divenis Usana stato en 1868. Pos l'interna milito, politikala partopreno di negri augmentis. Tamen, pos ke federala trupi evakuesis en 1877, blanki de Demokrata partiso itere kontrolis la povo.

En 1898, lokala legifantaro komandita da blanki Demokrata aprobis nova konstituco qua fakte abolisis elektal yuri de la maxim multa negri, per imposti ed exameni pri alfabetizado. En 1896 existis 130 334 negri apta a votar. Du yari pos l'adopto di la nova konstituco, en 1900, nur 5 320 negri restis apta a votar.

Petrolo deskovresis en la stato en 1901. En 1915, lokala muzikala stilo nomizesis jazo (jazz). En 1926, l'unesma aeroportuo dil stato inauguresis en Mansfield. En 1932, inauguresis la nuna edifico dil parlamento en Baton Rouge. Depos l'ekonomiala krizego di 1929 la stato guvernesis da Huey Long, populista guvernisto, akuzita pri esar autokrato. Lu asasinesis en 1935.

Dum la duesma mondomilito multa employi kreesis en la stato. Mili di laboristi, blanki e negri, migris de Kalifornia serchante plu bona employi en armal industrio. Pos la milito, en 1947 komencis l'exploto di petrolo en la stato. Dum la yari 1950a, la stato kreis nova postulaji por probar la kapaceso di individui pri votar. Malgre to, la quanto di negra elekteri kreskis, ed atingis 32% del individui apta a votar en 1964. Ante, en 1963, Universitato Tulane admisis l'unesma 5 Afrikan-Usana studenti. En 1965, depos l'aprobo di la lego pri civila yuri en 1964, federala guvernerio Usana imperis lokala polico protektar negra aktivisti, pro violentoza rezisto di blanki qui probis impedar negri uzar publika loki.

Erste ye la 11ma di junio 1970, Louisiana ratifikis la 19ma emendo di Usana konstituco, segun quo mulieri darfis votar. En 1974 revokesis lego de 1921, segun quo l'Angla esis la sola linguo docita en la stato. En 1977, Ernest Morial divenis l'unesma Afrikan-Usana urbestro di New-Orleans. En 1979 David Treen divenis l'unesma Republikano guvernisto dil stato.

Pro sua proximeso a la gulfo di Mexikia, Louisiana multafoye afektesis da forta uragani e tropikala tempesti dum sua historio. En 1992, Louisiana frapesis da uragano Andrew, qua efektigis US$ 1 miliardo en domaji. Ye la 29ma di agosto 2005, kom konsequi del uragano Katrina, multa basa arei dil stato subisis inundado. Pro rupto di digi qui cirkondis New-Orleans, plua kam 80% del urbo inundesis. Mili di individui ne abandonis sua inundita domi e kelke mortis, malgre avizi pri serchar refujeyi en sekura loki.

Geografio

Mapo di Louisiana kun sua precipua chosei.

Inundebla regioni (Wetlands) di Louisiana

La tereni di Louisiana esas basa: la maxim alta punto dil stato esas Monto Driskill, kun 163 metri di altitudo. Cirkume 52 000 km² esas aluvionala tereni, inkluzite fluviala marshi, litorala marshi e plaji.

La klimato dil stato esas subtropikala (Cfa segun la klimatala klasifikuro da Köppen), kun longa, varma e humida someri e kurta e milda vintri. Ta klimato esas dominacanta pro la modesta altitudi dil stato, sua basa latitudo, e sua proximeso (min kam 320 km per rekta lineo en sua maxim distanta punto) de gulfo di Mexikia. Pluvas dum la tota yaro, tamen l'epoko maxim pluvoza iras de aprilo til septembro. Oktobro esas la min pluvoza monato. Omnayare, la stato recevas mezavalore 1450 mm di pluvo-quanto.

Ekonomio

Navo por transportar buxegi che portuo di New Orleans.

La totala interna produkturo di Louisiana atingis US$ 256,4 miliardi en 2024, pos ajusti qui konsideras l'inflaciono. La precipua ekonomiala sektoro esas servadi, qua reprezentas 66% de interna produkturo, pose industrio (cirkume 33%), ed agrokultivo.

La stato dependas multe del extraktado di naturala resursi, nome petrolo e naturala gaso Havanta plua kam 280 mil petrolo-putei, la stato esas un ek la precipua produkteri di petrolo de Usa. La precipua industriala produkturi esas kemiala e petrokemiala produkturi, karbono, nutrivi industriizita, transporto-equipuri, e produkturi ek papero.

Agrokultivo nur reprezentas 1,1% del interna produkturo. La precipua agrokultivala produkturi esas sukrokano, kotono, soyo e rizo.