Kolorado

De Wikipedio
State of Colorado
Stato di Usa
Chefurbo Denver
Maxim granda urbo Denver
Oficala linguo Angla
Surfaco 269 837 km²
Habitanti
Denseso di habitantaro
5 695 564 (2018)
19,9 hab./km²
Guberniestro Jared Polis (D)
Transformo en stato: 1ma di agosto 1876
Posto-kodexo abreviuro CO
Reto www.colorado.gov

Kolorado esas Usana stato. Lu havas kom vicini Wyoming norde, Nebraska nord-este, Kansas este, Oklahoma sud-este, Nova-Mexikia sude, ed Utah weste.

Bazala fakti pri Kolorado.

Historio[redaktar | redaktar fonto]

La regiono di nuna Kolorado habitabas da indijeni de plu kam 13.000 yari ante nun. Che la regiono Lindenmeier trovesis restaji pri objekti de 11.200 yari aK til cirkume 3.000 yari aK. La Rokoza Monti esis importanta migrado-voyo qua permisis l'expanso dil unesma habitanti di Amerika.

L'unesma Europani qui arivis en la regiono esis Hispani, qui fondis la provinco Santa Fé de Nuevo Méjico en 1598. De la nedependo di Mexikia en 1821 til 1848 la westo di nuna Kolorado esis Mexikiana teritorio, dum ke la nord-estala rivo dil fluvio Arkansas apartenis ad Usa depos 1803, pos ke Napoléon la 1ma vendis Franca Louisiana ad Usana guvernerio. La nuna westo di Kolorado anke divenis Usana teritorio tra la Traktato di Guadalupe-Hidalgo, pos finir la Mexikia-Usana milito.

Kolorado divenis Usana stato ye la 1ma di agosto 1876.

Geografio[redaktar | redaktar fonto]

La teritorio di Kolorado havas rektangulala formo. Lua reliefo havas ambe monti e plana regioni. La maxim alta monto dil stato esas Monto Elbert[1][2], kun 4.401 metri di altitudo, la maxim alta punto de la Rokoza Monti. Este de la Rokoza Monti existas vasta platajo, kun altitudi de 1.000 til 2.000 metri.

Ekonomio[redaktar | redaktar fonto]

Segun la listo Top States for Business publikigita en 2010, Kolorado esis la 3ma maxim bona Usana stato por facar aferi. La precipua ekonomial agadi dil stato esas l'agrokultivo, l'industrio (nome alta teknologio, nutrivi, equipuri por transporto, mashinifado, kemiala produkturi e l'extrakto di minerali, nome oro, arjento e molibdo) e guvernal agadi.

Demografio[redaktar | redaktar fonto]

Usana Kontado-Ministerio kalkulis ke la habitantaro di Kolorado esis 5 695 564 personi ye la 1ma di julio 2018. Segun la demografiala kontado di 2010, 83,7% de la habitantaro esis blanki, 20,7% esis Hispan-Amerikani o Latin-Amerikani, 4% esis negri, 3,4% esis mestici, 2,8% esis Azian-Amerikani, 1,1% esis indijeni, 0,1% esis Havayiani o Pacifik-insulani, e 7,2% esis de altra etnii.

Segun religio, 64% esis kristani, di qui 44% protestanti; 1% esis judi, 1% esis Mohamedani, 1% esis Budisti, e 29% ne havis religio.[3] Segun idiomo, Hispana linguo esas la duesma maxim parolata, dop l'Angla. La linguo Ute, o Sudala Paiute, esas l'unika indijena linguo parolata che la stato.

Denver esas la chef-urbo e maxim granda urbo dil stato. Altra importanta urbi esas Kolorado Springs ed Aurora.

Referi[redaktar | redaktar fonto]


Stati di Usa

AlabamaAlaskaArizonaArkansasConnecticutDelawareFloridaGeorgiaHavayiIdahoIllinoisIndianaIowaKaliforniaKansasKentuckyKoloradoLouisianaMaineMarylandMassachusettsMichiganMinnesotaMississippiMissouriMontanaNebraskaNevadaNordal KarolinaNordal DakotaNova-HampshireNova-JerseyNova-MexikiaNova-YorkOhioOklahomaOregonPensilvaniaRhode IslandSudal KarolinaSudal DakotaTennesseeTexasUtahVermontVirginiaWashingtonWestal VirginiaWisconsinWyoming