Neneh Cherry

De Wikipedio
Salti al navigilo Salti al serĉilo
Neneh Cherry en 2013

Neneh Mariann Karlsson (n. 10 marto 1964), konocata kom Neneh Cherry, esas sueda kantistino, kansonifero e brodkastero.

El divenis famoza e sucesoza dum la 1980 yari per l'albumo Raw Like Sushi, e la disketi Buffalo Stance e Manchild. En 1994 el editesis la kansono 7 Seconds kun Youssou N'Dour.

Cherry naskis kom Neneh Mariann Karlsson en Stockholm, Suedia, la filiino di Monika "Moki" Karlsson (1943-2009), sueda piktisto ed artisto, e la muzikisto Ahmadu Jah (1936-2018). Jah ipsa naskis en Sierra Leone.

Elua genitori separis su frue ed elua matro mariajesis kun la influiva usana jazo-muzikisto Don Cherry. El adoptis la familio-nomo di elua stifpatro. La muzikisto Eagle-Eye Cherry esas elua mi-fratulo.

El translojis a Britania kande el evis 14 yari, meze dil punk-epoko, ed el rimemoras ke el trovis "sua homi" ibe. El renkontris Tessa Pollitt, Viv Albertine ed Ari Up dil bando The Slits pro ke elua stifpatro, Don Cherry, konocis li. El ed Ari kunlojis en domacho ("squat") en Battersea, London.

El komencis sua solo-kariero en 1982 per "Stop the War", protesto-kansono pri la Falklands-Milito. El laboris kun Jonny Dollar, The The e Cameron McVey, ilqua kunskribis elua debut-albumo di 1989 Raw Like Sushi, e kun qua el pose mariajesis. El partoprenis la urbana kulturala "ceno" di Bristol, e helpis aranjar l'albumo Blue Lines da Massive Attack. E Robert Del Naja ed Andrew Vowles di Massive Attack kontributis ad elua albumo Raw Like Sushi.