Provinco Buenos Aires

Buenos Aires Mar del Plata, un ek la maxim konocata turistal urbi di la provinco. Chefurbo La Plata Surfaco 307 571 km² Habitanti Denseso di habitantaro 15 625 084 (2010) 51 hab./km² Guberniestro Axel Kicillof Horala zono UTC-3 Reto www.gba.gov.ar

La Provinco Buenos Aires esas la maxim populoza e richa di Arjentinia. Lua chef-urbo esas La Plata. Arjentiniana chef-urbo, Buenos Aires, ne apartenas a ca provinco.

Historio

La cabildo (municipala konsilistaro) esis la centro di lokala povo en Buenos Aires de 1580 til 1821.

Ante l'arivo di Hispani, la regiono habitesis da indijeni, nome etnii Charrúa e Querandí. Dum la sequanta 350 yari pos la koloniigo, lia kulturi desaparis. Multi mortis pro morbi portita da Europani, e la transvivinti unionis su ad altra tribui od ad Europani. En 1536, Pedro de Mendoza fondis Santa María del Buen Ayre, e malgre ke l'unesma kontakto kun aborijeni esis pacoza, balde ol divenis konfliktoza. L'urbo evakuesis en 1541. En 1580, Juan de Garay itere fondis la kolonieto, e nomizis ol Santísima Trinidad y Puerto Santa María de Los Buenos Aires.

Malgre konflikti kun l'aborijeni, gradope farmeyi por edukado di bovi expansis su tra arei vicina al urbo, qua divenis centro ekonomiala di la regiono. Pos la kreo di vicerejio di Fluvio Plata ye fino dil 18ma yarcento, l'exportaco di karno, ledro e lua produkturi tra la portuo di Buenos Aires divenis la bazo por la developo ekonomiala di la regiono. Jezuiti probis, sensucese, enkorpigar aborijeni a la kulturo portita da Hispana konquesteri. Dum la fino dil 18ma yarcento obtenesis kelk equilibro en la situaciono, kande fluvio Salado divenis la limito inter la du kulturi. Ca equilibro ruptesis en 1879 kande komencis tale nomizita conquista del desierto ("konquesto di la dezerto"), dum qua l'aborijeni preske extingesis komplete.

Ekonomio

La suli di la provinco esas un ek la maxim fertila de la Tero. Li uzesas por agrokultivo ed edukado di bestii, nome bovi. Lua maxim importanta agrokultivala produkturi esas frumento, maizo, tornasolo e soyo. Komence, la maxim multa tereni uzesis por edukado di bestii, ma depos la yari 1990a, nova agrokultivala tekniki posibligis augmentar la quanto di kultivi, nome soyo. Anke kultivesas frukti, patato e manjebla folii, nome proxim urbo Buenos Aires. Che urbo Médanos, proxim Bahía Blanca, kultivesas vit-bero e produktesas vini kun ecelanta qualeso, de vitoberi malbec, cabernet sauvignon, tannat, chardonnay e sauvignon blanc.