1634. Ye la bordo di Germania an la Norda Maro, l'inundo Burchardi eventis; dum forta sturmo, ondo-reperkutado penetris la marala defensili di Schleswig-Holstein ye multa loki. Cirkume 15.000 homi mortis. Pose, plura defensili esis ri-konstruktata, ma multa tereno sub maro-nivelo esis permane perdata. La plu multa de la insulo Strand, ube du-triimi de la habitanti mortis, esis perdata, la mikra insuli Nordstrand e Pellworm restante.
1896. En Wien, la kompozisto Anton Bruckner mortis, evante 72 yari. Ilua precipua verki esas la non simfonii, la unesma simfonio kompozita en 1866, la lasta komencita en 1887 e nekompleta ye lua morto. La simfonii havas plura versioni, modifikita da Bruckner ed ilua kolegi; esas kelkafoye ne klara qua versiono esas egardenda kom autentika. Bruckner esis humila homo, quo kontrastas kun la grandeso di la simfonii.
1968. Apollo 7, misiono di la Apollo-projeto por eventuala voyajo a la luno, lansesis. Ol esis la unesma Usana misiono portanta homi depos la tragedio di Apollo 1, en qua tri homi mortis ye la lanso-loko. Dum terala orbito, la tri membri di Apollo 7 sucesoze probis la equipajo; to posibligis la sendigo di Apollo 8 pos du monati, qua atingis orbito cirkum la luno. Apollo 7 esis la unesma Usana misiono dum qua TV-sendajo transmisesis de spaco. La membri di la misiono retrovenis a Tero ye 22 di oktobro.
