Shablono:Eventi/13 di decembro

American in Paris

• 1895. En Berlin, la Simfonio no. 2, da Gustav Mahler, esis unesmafoye pleata en kompleta versiono, direktata da la kompozisto. Ol divenis sucesoza dum la vivo di Mahler. Il kompozis la unesma de la kin movimenti en 1888 kom separita verko; il plu tarde decidis skribar plusa movimenti. La lasta movimento, qua duras plu kam mi-horo, inkluzas koro, qua kantas versi de la poemo Die Auferstehung (La Rivivigo) da Friedrich Gottlieb Klopstock, e plusa versi skribita da Mahler. La simfonio, nomizita la Rivivigo-simfonio, duras cirkume 90 minuti.

• 1928. En New York, la orkestrala verko An American in Paris, da George Gershwin, esis unesmafoye pleata. Ilua koncerto-peco por piano ed orkestro, Rhapsody in Blue, aparis en 1924; il voyajis ad Europa en 1928 e renkontris plura kompozisti ed artisti. Dum ke il rezidis en Paris il kompozis ca verko. Il skribis, "Mea skopo hike esas deskriptar la impresuri di Usana vizitanto en Paris dum ke il flanas cirkum la urbo, askoltas la diversa strado-bruisi, ed absorbas la Franca atmosfero."

• 1944. En Paris, la piktisto Vasili Kandinski mortis, evante 77 yari. En 1897 il abandonis kariero kom akademiala legisto en Moskva, e studiis arto en München. Il esas notenda pro ilua abstraktajo-pikturi, quin il komencis produktar en 1910. Ilua skriburi pri la teorio di arto esis influoza. Il retrovenis a Moskva en 1914, ube il docis arto. De 1922 il rezidis en Germania e docis ye la arto-skolo la Bauhaus; de 1933 il rezidis en Paris, ube il produktis notenda pikturi.