1755. Severa tertremo eventis ye Lisboa, Portugal. La tertremo duris dum plura minuti, ed efektigis fairi en la urbo; tsumani sequis pos 40 minuti. Cirkume 30.000 de la 200.000 habitanti di Lisboa mortis, ed 85 procent de strukturi di Lisboa esis destruktata. Multa homi mortis altra-loke en Portugal ed en Hispania e Maroko. Preske omna kirki en Lisboa esis destruktata, quo iniciis multa diskutado di teologiisti pri la religiala kauzo e signifiko. La evento influis la pensadi di filozofi inkluzanta Voltaire e Rousseau.
1876. En Nederlando, la Nord-Mara Kanalo esis apertata da la rejulo Willem la 3ma. Olua longeso esas 25 km; ol konektas la urbo Amsterdam a la Norda Maro ye IJmuiden. Konstruktado di la kanalo, intencita por navi e la plubonigo di komerco kun la portuo di Amsterdam, komencis en 1865. La larjeso di la kanalo lore esis 27 m e la profundeso esis 7 m; la kanalo depose esis plugrandigata plura foye.
1962. Mars 1, kosmosondilo di USSR, lansesis. La intenco esis fotografar la surfaco di la planeto Marso. Kurte pos ke ol esis pozata aden trajektorio por la planeto, on deskovris ke, pro malfunciono di valvo, plusa korektigi di la voyo ne esus posibla; la sondilo pasis Marso ye disto 197.000 km, ye 19 di junio 1963. Ol esis la unesma kosmosondilo qua preter-iris Marso. Kontakto kun la sondilo esis ja perdita ye 21 di marto 1963. Dum la periodo di kontakto, informeso transmisesis pri la magnetala feldo di Tero, ionizita gasi de la Suno e meteoro-kolizioni.
