1793. La unesma flugo per balono en Amerika eventis. Jean-Pierre Blanchard, Franca pioniro di balono-flugado, lansis balono en Philadelphia, Pensilvania, ed ilua flugo konkluzis en Deptford, Nova Jersey. George Washington, Prezidanto di Usa, spektis la evento. La unesma flugo per balono portanta homi eventabis en 1783; Blanchard unesmafoye acensis en balono en 1784 en Paris, ed il pose demonstris balono-flugado en plura landi en Europa, ante voyajante ad Usa por plusa demonstradi.
1909. En Antarktika, pos du dii en tendo pro tempesto, la exploristo Ernest Shackleton e tri altra membri di ilua expediciono facis lasta marcho vers la sudo, ed atingis lia maxim proxima disto, 180km de la suda polo, latitudo 88° 23' S. Ol tatempe esis la maxim fora sudala poziciono atingita da irgu. La marcho vers la polo komencabis ye 29 di oktobro 1908, pos arivo ye la marbordo di Antarktika sur la navo Nimrod frue en ta yaro. Konciante ke li ne havas suficanta manjajo por pluse irar vers la suda polo e posvivar, li mustis retroirar.
1947. En New York, la opero Street Scene, da Kurt Weill, esis unesmafoye pleata. Weill rezidabis en New York depos 1935, ed il ibe ja kompozabis plura sucesoza dramatala verki. La rakonto di la opero skribesis da Elmer Rice, fondita sur ilua dramato di la sama titulo: ol deskriptas la tensita vivi di plura vicina familii, en povra parto di New York en varmega vetero.
