Theatercaféen

De Wikipedio
Salti al navigilo Irez a serchilo

Theatercaféen esas restorerio en la Hotelo Continental en Oslo, Norvegia.

Theatercaféen

Theatercaféen apertesis en 1900 e situesis opozite la Nacionala Teatro, olqua apertesis dum la antea yaro.  La restorerio e hotelo originale proprietesis da la Biriferio Foss (Foss Bryggeri).  Caroline Boman Hansen (1860-1956) e Christian Boman Hansen (1868-1915) asumis la lokaco-kontrato en 1909, e pos nur tri yari li povis komprar oli.  Elisabeth C. Brochmann esas la nuna proprietanto.  En 1985, el asumis jero de sua matro Ellen Brochmann.

Theatercaféen modernigesis en 1949, e la restorerio kelke perdis sua distinta medio.  En 1971, Theatercafeen itere rinovigesis, icafoye retroe a sua originala Art Nouveau-stilo, surveyata dal arkitekto Hans Gabriel Finne.  Parti del originala mobli esis ankore integra, e per studiar anciena fotografuri esis posibla restaurar Theatercafeen a lua originala stilo.  Inspireso anke glinesis dum voyaji a Paris, København e Stockholm.  La pavimento konsistas ek plua kam 100.000 peceti de linoleumo.  La restorerio itere rinovigesis en 2010, e nun inkluzas nova drinkeyo e chambre séparée. Theatercaféen rapide divenis renkontreyo por influiva membri dil norvegiana "ceno" artala e kulturala, inkluze Sigurd Bødker, Sven Elvestad, Herman Wildenvey ultre aktoruli ed aktorini dil Nacionala Teatro.  De 1924, portreti di tala gasti facesis e lokizesis sur la muri di la restorerio.  La tradiciono duras, e la kolekturo nun kontenas 81 portreti di autori, aktori, piktisti, fotografisti, muzikisti e kompozisti, omna olima o nuna klienti dil restorerio.