Norvegia

De Wikipedio
Salti al navigilo Irez a serchilo
Norvegia
Kongeriket Norge
Kongeriket Noreg
Flag of Norway.svg Coat of arms of Norway.svg
Standardo di Norvegia Blazono di Norvegia
Nacionala himno:
Ja, vi elsker dette landet
EUR location NOR.PNG
Urbi:
Chefurbo: Oslo
· Habitanti: 634 463 (2018)
Precipua urbo: Oslo
Lingui:
Oficala lingui: Norvegiana
Guvernerio:
Tipo: Monarkio
· Rejo: Harald la 5ma
· Chefministro: Erna Solberg
Surfaco: (67ma granda)
· Totala: 385 207[1] km²
· Aquo: 6 %
Habitanti: (120ma granda)
· Totala: 5 328 212[2] (2019)
· Denseso di habitantaro: 15,8 hab./km²
Plusa informi:
Valuto: Krona di Norvegia
Veho-latero: dextre
ISO: NO
NOR
578
Reto-domeno: .no*
Precipua religio: kristanismo, 94%
Oficala retosituo: http://www.norway.no/, http://www.norge.no, http://www.noreg.no


Norvegia esas lando jacanta an nordal Europa. Lu havas kom vicini Rusia e Finlando nord-este, e Suedia este. Sude e weste jacas l'oceano Atlantiko, e norde, l'Arktika oceano.

Bazala fakti pri Norvegia.

Historio[redaktar | redaktar fonto]

Prehistoriala pikturi en Alta.
 Precipua artiklo: Historio di Norvegia

Arkeologiala restaji indikis ke populi ja vivis en la regiono di la nuna Norvegia depos 10 000 yari a.K. Li arivis ibe kande la situo di lua litoro permisis navigar, peskar e chasar. Ca populi esis nomada, e habitis Magerøya cirkume 9.300 aK. Multa historiisti opinionas ke Skandinaviana populi originis de la nuna Germania.[3]

Til la komenco di la 9ma yarcento multa mikra rejii existis em la nuna Norvegia. Harald Hårfagre unionis li e divenis rejulo di Norvegia en 872.

Dum Vikinga epoko (de la 8ma til la 11ma yarcento) eventis expanso a nova teritorii ed ekmigrado di habitanti. Vikingi koloniigis Islando, Faero, Grenlando e parto di Britania, Irlando e Francia. Nuna Limerick, Dublin e Waterford, en Irlando, fondesis dal Norvegiana Vikingi.[4]

Kalmar-Uniono cirkum la yaro 1400.

Dum la 14ma e la 15ma yarcenti Dania, Suedia e Norvegia monarkii unionesis e formacis Kalmar-Uniono. Suedia abandonis l'uniono en 1523, ma Norvegia restis en ol til 1814.

Norvegia divenis nedependanta de Dania ye la 17ma di mayo 1814 e nominis Dana princo Christian Fredrik kom rejulo. Ica fakto esis motivo por Sueda-Norvegiana milito. Norvegia ne povis vinkar la milito, ed aceptis l'uniono kun Suedia.

Norvegia divenis nedependanta de Suedia ye la 7ma di junio 1905. Dum l'Unesma mondomilito la lando restis neutra, ma dum la Duesma mondomilito nacional-socialista Germania invadis ol, en 1940. Vidkun Quisling instalis guvernerio qua kunlaboris kun Germani, ma parto di la habitantaro ne aceptis l'okupeso, e developis rezisto e sabot-agadi kontre la Germani. En 1945 Germani vinkesis, e Vidkun Quisling arestesis ye la 9ma di mayo 1945 e mortigesis ye la 24ma di oktobro sam yaro.

Einar Gerhardsen salutas la rieniro di Haakom la 7ma a Norvegia, ye la 7ma di junio 1945.

Einar Gerhardsen divenis l'unesma chefministro di lando pos la milito, e guvernis de la 25ma di junio 1945 til la 9ma di novembro 1951. Il adoptis Keynesana teorii por rikonstruktar l'ekonomio.

En 1969 petrolo deskovresis en Norvegiana litoro. En 1973 la lando fondis sua propra petrolo-kompanio, Statoil.

En du plebiciti - 1972 e 1994 - Norvegiana populo manifestis deziro pri ne enirar l'Europana Uniono, quankam la lando aceptis partoprenar en la komuna merkato ed en la konkordo Schengen. En 1981 la lando elektis lua unesma chefministrino: Gro Harlem Brundtland, qua guvernis de februaro til novembro ta yaro. En 1986, pos la renunco di Kåre Willoch el itere divenis chefministro, til 1989. Dum la yari 1990ma, Norvegia pagis komplete lua extera debo.

Politiko[redaktar | redaktar fonto]

Rejala palaco en Oslo.
La parlamento (Storting) di Norvegia.

Segun lua konstituco, adoptita ye la 16ma di mayo 1814, Norvegia esas konstitucala monarkio. Rejulo Harald la 5ma esas la chefo di stato pos 1991, e lua povi esas nur reprezentiva e ceremoniala. La chefministro - nune Erna Solberg - esas la chefo di guvernerio. En 1913 la lando aprobis lego qua darfis mulieri votar.

La parlamento (Stortinget) havas unika chambro kun 169 membri qui elektesas dal populo por 4-yara periodo. Ja judiciala povo kompozesas da supra korto kun 19 membri, regional apelo-korti, urbala e komunala korti, e konsilantari por koncilio[5].

Geografio[redaktar | redaktar fonto]

Norvegia kun lua precipua urbi.
Monto Galdhøpiggen, la maxim alta di Norvegia.

Granda parto di Norvegiana teritorio esas montoza e kovrata da glacieri, e lua peizajo modifikesis dum yarmili pro la glacial erodo. Lua nerekta litoro havas centi di fyordi e mili di insuleti. Ol havas 2 542 km di sika frontieri kun Suedia, Finlando e Rusia este, e 25 148 km di litoro en la kontinento (83 281 km kande on inkluzas la insuli, e 92 260 km inkluzite Svalbard e Jan Mayen). Lua maxim alta monto esas Galdhøpiggen, kun 2 469 m di altitudo.

La sudo di Norvegia havas plu varma klimato e recevas plua pluvi kam la nordo. Dum somero en sudo, la regioni di fyordi e vali doplanda recevas min venti e havas la maxim alta mezvalora temperaturi (17°C en Oslofjord). Sud-weste e sude, la lando recevas multa pluvo-quanto, qua superiras 3.500 mm omnayare. Dum la printempo la diferi di temperaturi inter la nordo e la sudo di la lando esas maxima.

La fluvio Glomma proxim Fredrikstad.

La maxim multa fluvii di Norvegia esas kurta, pro la relevo di la lando. Lua precipua fluvio esas Glomma, longa de 601 km. Existas multa aquofali, di qui la maxim alta esas Kjelfossen (alta de 840 m) e Søndre Mardalsfoss (alta de 705 m).

Norvegia havas richa biodiverseso: en la lando existas 450 speci di uceli, 90 speci di mamiferi, cirkume 16.000 di insekti, e 2.800 speci di vaskulala planti, di qui 13 esas endemika. La naturala vejetantaro varias segun la latitudo: ordinare existas min multa diferanta speci di arbori kam la regioni Nord-Amerikana en la sama latitudo. To eventas por esar nefacila la disperso di arborala semini de la sudo di Europa vers Norvegia: la riveri en Norvegia ordinare fluas norde til sude, e la montari formacas barieri por la venti e por la disperso di semini.

Tundro kovras 32% de la surfaco di la lando, nome norde, ed en montoza regioni.

Ekonomio[redaktar | redaktar fonto]

L'exportacaji di Norvegia en 2012.
Petrolala platformo en Norda Maro.
 Precipua artiklo: Ekonomio di Norvegia

Norvegia havas la duesma maxim granda TNP per persono di Europa, dop Luxemburgia. La lando havas vasta jaceyi di petrolo, naturala gaso, minerali, abundanta ligno, fishi, aquo ed hidroelektral energio. L'exportacaji di petrolo e naturala gaso reprezentas 20% de la TNP.

Lua ekonomio mixas moderna privata sektoro e libera merkato kun statala entraprezi e sistemo di publika sekureso sociala. La guverno administras la sektori di petrolo, hidroelektrala energio, la produktado di aluminio, la maxim granda banko de la lando e la maxim granda telekomunikala entraprezo, Telenor.

En du plebiciti - 1972 e 1994 - la habitantaro di Norvegia refuzis membreskar l'Europana Uniono. Tamen, la lando partoprenas en la komuna merkato ed en la konkordo Schengen kun EU, e formacas l'Europana konkordo pri libera merkato - EFTA - kun Suisia, Islando e Liechtenstein.

Demografio[redaktar | redaktar fonto]

Skolani celebras la Dio di la Konstituco en Oslo.
La dialekti di la Norvegiana linguo.

Segun statistiki de 2018, Norvegia havis 5 328 212 habitanti.[2] La maxim multa (83,2%) esas Norvegi, inkluzite cirkume 60.000 Sami. Altra Europani esis 8,3%, ed altra populi esis 8,5%.[6]

Oficala inquesto publikigita en 2012 montris ke 86% de la habitantaro havis adminime 1 genitoro naskinta en Norvegia.[7] Plua kam 710.000 personi (14% de la habitantaro)[8] esas enmigranti e lia decendanti. De la enmigranti, 39% havas Ocidental origino (Australiani, altra Europani...), e 61% havas Aziana od Afrikana origino (Marokani, Pakistanani, edc.).

La linguo Norvegiana oficale skribesas per du formi: la tradicionala Bokmål e la moderna Nynorsk, kreita en 1929. Cirkume 85% til 90% ek la Norvegiani preferas skribar per Bokmål. Ne existas unika pronunco por la Norvegiana linguo, ed existas multa dialekti en la lando. Minoritati parolas la lingui Sami e la linguo Kver, qua judikesas kom dialekto de la Finlandana linguo.

Segun religio, la maxim multa habitanti esas Luterani (71,5%). Katoliki Romana esis 2,8%, altra Kristani esis 3,9%, Mohamedani esis 2,8%, altri esis 2%, e 7,6% ne informis pri religio segun statistiki de 2016.[6]

La maxim granda urbo esas la chef-urbo, Oslo, kun plua kam 900.000 habitanti. Altra importanta urbi esas Bergen, Stavanger e Drammen.


La maxim granda urbi di [[{{{lando}}}]] (2013) La maxim granda urbi di Norvegia (2013)
Rango Nomo Provinco Regiono Habitantaro Rango Nomo Provinco Regiono Habitantaro
1ma Oslo [[{{{provinco1}}}]] [[{{{regiono1}}}]] 925 228 11ma [[{{{nomo11}}}]] [[{{{provinco11}}}]] [[{{{regiono1}}}]] {{{hab11}}}
2ma Bergen [[{{{provinco2}}}]] [[{{{regiono2}}}]] 247 731 12ma [[{{{nomo12}}}]] [[{{{provinco12}}}]] [[{{{regiono12}}}]] {{{hab12}}}
3ma Trondheim [[{{{provinco3}}}]] [[{{{regiono3}}}]] 169 972 13ma [[{{{nomo13}}}]] [[{{{provinco13}}}]] [[{{{regiono13}}}]] {{{hab13}}}
4ma Stavanger [[{{{provinco4}}}]] [[{{{regiono4}}}]] 132 102 14ma [[{{{nomo14}}}]] [[{{{provinco14}}}]] [[{{{regiono14}}}]] {{{hab14}}}
5ma Drammen [[{{{provinco5}}}]] [[{{{regiono5}}}]] 110 503 15ma [[{{{nomo15}}}]] [[{{{provinco15}}}]] [[{{{regiono15}}}]] {{{hab15}}}
6ma Fredrikstad [[{{{provinco6}}}]] [[{{{regiono6}}}]] 78 428 16ma [[{{{nomo16}}}]] [[{{{provinco16}}}]] [[{{{regiono16}}}]] {{{hab16}}}
7ma Skien [[{{{provinco7}}}]] [[{{{regiono7}}}]] 63 952 17ma [[{{{nomo17}}}]] [[{{{provinco17}}}]] [[{{{regiono17}}}]] {{{hab17}}}
8ma Kristiansand [[{{{provinco8}}}]] [[{{{regiono8}}}]] 58 662 18ma [[{{{nomo18}}}]] [[{{{provinco18}}}]] [[{{{regiono18}}}]] {{{hab18}}}
9ma Sarpsborg [[{{{provinco9}}}]] [[{{{regiono9}}}]] 54 192 19ma [[{{{nomo19}}}]] [[{{{provinco19}}}]] [[{{{regiono19}}}]] {{{hab19}}}
10ma Tønsberg [[{{{provinco10}}}]] [[{{{regiono10}}}]] 49 735 20ma [[{{{nomo20}}}]] [[{{{provinco20}}}]] [[{{{regiono20}}}]] {{{hab20}}}
Downtown Oslo Norway skyline.png
Oslo
Fløyen view on Bergen edit.jpg
Bergen
[[Arkivo:{{{imajo3}}}|170px]]
Trondheim
[[Arkivo:{{{imajo4}}}|170px]]
Stavanger
Fonto: Statistiki Norvegia[9]

Kulturo[redaktar | redaktar fonto]

Edvard Munch, la maxim konocata Norvegiana piktisto.

L'expresionista Edvard Munch esas la maxim bone konocata Nederlandana piktisto en tota mondo. Johan Christian Dahl, konocata kom J. C. Dahl (1788-1857), judikesas kom "la patro di la pikturo di peizaji en Norvegia". Frits Thaulow esas la precipua piktisto de Norvegian Impresionismo, dum ke Christian Krohg esis la precipua de Norvegiana realismo.

Norvegiana literaturo developis multe dum la 18ma e 19ma yarcenti, kande aparis romantikismo e nacionalismo. L'Ora Epoko en Norvegian arti e literaturo eventis dum la 19ma yarcento: l'autori Henrik Ibsen, Bjørnstjerne Bjørnson, Alexander Kielland e Jonas Lie esis la maxim importanta de ta epoko. Dum la 20ma yarcento tri Norvegiani ganis la Nobel-premio pri literaturo: Bjørnstjerne Bjørnson, Sigrid Undset e Knut Hamsun.

Mayhem, bando Norvegiana di jenro black metal.

Pri muziko, tri importanta nomi dum romantika periodo esis Edvard Grieg, Rikard Nordraak e Johan Svendsen. La lando anke havas forta tradiciono pri folklorala muziko. La maxim remarkinda nomi en folklorala muziko esas la violinisti Andrea Een, Olav Jørgen Hegge, Vidar Lande, Susanne Lundeng e Annbjørg Lien, e la kantisti Agnes Buen Garnås, Kirsten Bråten Berg e Odd Nordstoga. Pri moderna muziko, la subjenro black metal de heavy metal developesis multe en Norvegia, exemple la bandi Mayhem, Burzum, Darkthrone, Immortal, Emperor, Gorgoroth e Satyricon, qui divenis mondale konocita.

La cinemo Norvegiana obtenis internaciona agnosko. La dokumentala filmo Kon-Tiki (1950) ganis Oscar-premio de Usan akademio. Altra filmi indikesis por la premio, ma faliis ganar. Knut Erik Jensen esas un ek la maxim konocata Norvegiana filmifisti. Pos la yari 1990ma l'industrio cinemala en Norvegia kreskis, e nune produktesas cirkume 20 notinda filmi omnayare. La lando anke uzesas multafoye kom loko por filmuri por produkteri de Hollywood e de altra loki, exemple la ceni pri la glaciala planeto Hoth de la cinematografuro The Empire Strikes Back (1980) filmesis en la glaciero Hardangerjøkulen. Kelka ceni de la filmi Die Another Day, The Golden Compass, Spies Like Us e Heroes of Telemark e de la televiziono-serii Lilyhammer e Vikings anke cinematografesis en Norvegia.

La maxim populara sporti en Norvegia esas futbalo, biatlo, skio, hokeo* sur glacio, e handbalo.

Referi[redaktar | redaktar fonto]

  1. (2019). Arealstatistics for Norway 2019. Kartverket, mapping directory for Norway. URL vidita ye la 2019-03-23.
  2. 2,0 2,1 Population, 2019. Statistics Norway. URL vidita ye la 11 Mars 2019.
  3. http://hpgl.stanford.edu/publications/EJHG_2002_v10_521-529.pdf
  4. RF Foster: "The Oxford History of Ireland", Oxford University Press, 1989
  5. "The Judiciary" www.norway.org
  6. 6,0 6,1 Europe::Norway. CIA. URL vidita ye la 17ma di februaro 2019.
  7. (1ma di januaro 2012 (korektita ye la 30ma di aprilo 2012)) Persons with immigrant background by immigration category, country background and gender.. ssb.no.
  8. Questions about immigrant-related statistics (20ma di junio 2013). Key figures Immigration and immigrants - SSB. Ssb.no. URL vidita ye la 15ma di februaro 2018.
  9. Statistics Norway