Ribeirão Preto
| Ribeirão Preto | ||
| ||
| Kelk imaji pri Ribeirão Preto. | ||
|
| |
| Standardo | Blazono | |
| Lando: |  Brazilia
| |
| Stato: | Sao Paulo | |
Informo:
| ||
| Fondita ye: | 19ma di junio 1856 | |
| Latitudo: | 21°10'40"S | |
| Longitudo: | 47°48'36"W | |
| Altitudo: | 546 m | |
| Surfaco: | 651 km² | |
| Habitanti: | 698 259[1] (2022) | |
| Denseso di habitantaro: | 1073,3 hab./km² | |
| Disto de São Paulo: | 313 km | |
| Horala zono: | UTC-3 | |
| Urbestro: | Duarte Nogueira Junior (PSDB, 2021-2024) | |
Mapo:
| ||
| ||
Oficala retosituo:
| ||
| http://www.ribeiraopreto.sp.gov.br | ||
Ribeirão Preto esas urbo en Brazilia stato Sao Paulo. Segun la demografiala kontado di 2022, ol havis 698 259 habitanti.[1] Lua tota surfaco esas 651 km², di qui 127,3 km² esas urbala zono. Ensemble altra 33 municipi, ol esas centro di metropolala regiono kovranta 14 788 km² e havanta 1 755 029 habitanti en 2021.
Ribeirão Preto fondesis ye la 19ma di junio 1856 en regiono lor uzita por edukado di bovi. Pose, l'urbo kreskis kun l'expanso di kultivo di kafeo por exportaco. Pos la dekado dil kultivo di kafeo en 1929, altra kultivi e l'industrio divenis importanta. Nun, Ribeirão Preto esas importanta industriala, komercala e servadala centro distanta 313 km de la chef-urbo dil stato. Importanta universitati ed inquesto-centri, nome pri medicino, agrokultivo e zooteknio, havas sideyi en la urbo.
Geografio
[redaktar | redaktar fonto]
La reliefo di Ribeirão Preto esas dominacante kolinoza, kun vasta kolini poke alta, e plana en lia kulmini. L'altitudi varias de 500 metri (minima) til 700 metri (maxima). Lua mezavalora altitudo esas 546 metri.
La rivero Ribeirão Preto donis lua nomo al urbo. Alta importanta riveri esas Pardo, Moji-Guaçu, Grande, Sapucaí, Turvo, e Jacaré-Guaçu. Malgre la quanto di riveri e rivereti, l'aquo uzata en la urbo venas de granda subtera jaceyo nomizita aquífero Guarani, qua komencis explotacesar en 1930. Tamen, studii montras ke l'urbo mustos adoptar nova fonti di aquo, posible de la baseno de rivero Pardo, por suplear la kreskanta demando pro l'augmento di habitantaro.
Ribeirão Preto jacas en regiono olim kovrita da tropikala foresto mata Atlântica, e restaji de ca foresto duras esar prezervata en parki e placi dil urbo. Recente facesis riplantaco di arbori dil anciena foresto an rivi di riveri e kanali dil urbo.
La klimato dil Ribeirão esas tropikala (Aw segun la klimatala klasifikuro da Köppen) kun varma e pluvoza someri, e vintri sika kun temperaturi plu basa. La mezavalora temperaturo en januaro (somero) esas 24,9°C, kontre ke la mezavalora temperaturo en junio e julio (vintro) esas 19,9°C. Dum kelka vintri, la temperaturi povas esar multe basa, infre 5°C. La maxim alta temperaturo enrejistrita en la urbo esis 40,4°C, ye la 8ma di oktobro 2020. Dum somero, ultre pluvo anke povas kelkafoye falar greluno, e ventegi kun rapideso super 100 km/h anke povas eventar.
La pluvoza sezono iras de la duimo di oktobro til marto. La mezavalora yarala pluvo-quanto esas 1392,1 mm, e la maxim pluvoza monato esas januaro, kun mezavalore 265,8 mm. Dum multa dii de la sika sezono, atmosferala humideso povas falar infre 30%, o mem infre 20%, efektiganta augmento di respirala morbi en la habitantaro.
Referi
[redaktar | redaktar fonto]- ↑ 1,0 1,1 População em Ribeirão Preto (SP) é de 698.259 pessoas, aponta o Censo do IBGE - Publikigita da G1. Dato di publikigo: 28ma di junio 2023. Idiomo: Portugalana.