Bayo di Guanabara
Guanabara bayo esas naturala bayo en la stato Rio de Janeiro, Brazilia. Ol jacas inter l'urbi Rio de Janeiro weste, Duque de Caxias nord-weste, Magé norde, Guapimirim ed Itaboraí nord-este, e São Gonçalo e Niterói este.
Ol deskovresis ye la 1ma di januaro 1502 da Portugalana Gaspar de Lemos, qua ne exploris ol. La bayo recevis la nomo Rio de Janeiro ("rivero di januaro") pro Portugalani konfundar ol kun la ekflueyo de ula fluvio. L'indijeni nomizis la regiono Iguaá-Mbara (iguaá = marala stretajo, mbará = maro).
La surfaco totala de la bayo esas cirkume 412 km². Ol havas maxima larjeso di 28 km e minima larjeso di 1,6 km (1600 metri), e longeso maxima di 31 km de lua eniro a lua dopo. La mezavalora profundeso di la bayo esas 3 metri en lua dopo, 8,3 metri proxim la Ponto Rio-Niterói e 17 metri an lua eniro. La vejetantaro an la dopo di la bayo formacesas per manglieri.
La portuo di Rio de Janeiro, un ek la maxim importanta portui de Brazilia, jacas interne ol. An la insulo Governador, la maxim granda insulo en la bayo, jacas l'Internaciona Aeroportuo di Rio de Janeiro (l'aeroportuo Tom Jobim, anke konocata kom aeroportuo Galeão).
Omnadie, katamarani e hidrofolii trairas la bayo, de la placo Praça 15 en Rio de Janeiro vers l'insuli Paquetá e Governador, e vers l'urbo Niterói, transportante pasajeri qui rezidas en ica regioni e laboras en la centrala quartero di Rio de Janeiro. La ponto Rio-Niterói, inaugurita en 1974 e longa de 13,8 km, unionas Rio de Janeiro kun Niterói, ed anke permisas aceso a la chosei qui unionas Rio de Janeiro kun la stato Espírito Santo, kun la Nord-estala regiono di Brazilia ed anke kun la plaji de la Região dos Lagos.