Bob James (muzikisto)

Robert McElhiney "Bob" James (25ma decembro 1939) esas premiizita usana jaz-klavaristo, aranjero e disko-produktisto.

Il fondis la bando Fourplay e skribis la tem-kansono por la televizion-programo Taxi. Muziko de lua unesma tri albumi ofte riuzesis ("sampled") e to kontributis a la formaco di hip hop-muziko.

Frua yari e deskovreso

Robert McElhiney James naskis ye kristnasko-dio 1939 en Marshall, Missouri ad Albert Lamkin James ed Alice (n. McElhiney) James. Il havas plu olda fratino, Katherine. Il komencis plear piano ye la frua evo 4 yari. Lua unesma piano-docisto, Fratino Mary Elizabeth, qua docis che lokala katolika skolo, deskovris ke il havis perfekta tono. Evinta sep yari, James komencis studiar che Sno. R. T. Dufford, docisto che Missouri Valley College.

Lua unesma profesionala muzik-employeso esis kande il evis ok yari e pleis por danso-klaso.

Evinta 15 yari, James duris sua studii che Franklin Launer, che Christian College en Columbia, Missouri, kun plusa muzik-instrukto dum skolo de Harold Lickey, orkestro-duktero. Ultre piano, James anke povas plear trumpeto, timpani e perkut-instrumenti.

Dum 1950-56, il konkurencis en piano-konkursi che Missouri State Fair, e ganis plura blua rubandi. Il rimemoras ke "bovi judikesis en adjacanta edifici." Altra frua employesi inkluzis esar membro dil Earle Parsons Dance Band (c. 1952-55). Dum ta tempo il kompozis sua unesma aranjuro por danso-bandi.

Yaro pose, il asistis la Universitato di Michigan ed entamis sua voyajo vers gradi en muziko. Dum lua duesma yaro, James transferesis a Berklee College of Music en Boston, Massachusetts. Lua kunlojanto esis Nick Brignola, qua pose divenis eminenta saxofonisto. En Michigan, James pleis "libera" jazo kun muzikisti en Ann Arbor e Detroit. En 1962, lua bando konkurencis che la Notre Dame Collegiate Jazz Festival, ube la judikeri inkluzis Henry Mancini e Quincy Jones.

Lua bando ganis la konkurso, e Jones signatis James ad albumo-kontrato che Mercury Records. Mercury editis lua unesma albumo, Bold Conceptions (1963), exploro di "libera" jazo produktita da Quincy Jones, qua diferis kam la "glata" jazo pro qua il pose konocesis.

En New York-urbo, James laboris kom aranjero ed engajesis kom piano-akompanisto por jazo-kantisto Sarah Vaughn. Il riunionis su kun Quincy Jones kande Jones pregis lu aranjar registrago-sesioni. Creed Taylor, produktisto e fondinto di CTI Records, esis che la sesioni ed engajis James por CTI kom produktisto, aranjero e muzikisto. Dum la 1970a yari, James laboris ye albumi da Milt Jackson, Stanley Turrentine, Grover Washington Jr. e Maynard Ferguson.

Albumi

Creed Taylor invitis James registragar solo-albumo. La rezulto, One (1974), kontenis la kansono "Feel Like Making Love", ja suceso por Roberta Flack. James pleis piano por la kansono por Roberta Flack du semani ante registragar sua propra versiono, per la sama bando. Radio-kanali pleis amba versioni e to kontributis a lua komercala suceso.

Pos tri solo-albumi, James fondis sua propra kompanio, Tappan Zee. Nemediate pose, il editis disco-versiono di la Theme to Star Trek: The Motion Picture, e registragis la albumo Touchdown (1978). Inter la kansoni en ta albumo esis "Angela", la tem-kansono por la televizion-programo Taxi. James provizis omna muziko por Taxi e kolektis ol, inkluzanta "Angela", en The Genie: Themes & Variations from the TV Series Taxi (1983).

Kande il turis en 1979, il suportesis da reklamo-kampanio qua inkluzis afishi di lu duktanta flava New York-taxio. La plei konservesis en la albumo All Around the Town (1980).

James turnis de jazo a klasika muziko por registragar Rameau (1984), lua interpreti di Baroka-perioda kompozisto Jean-Philippe Rameau. En posa albumi, il interpretis verki da du plusa baroka kompozisti, J. S. Bach e Domenico Scarlatti.

James serchis basgitaristo dum registragar la albumo Grand Piano Canyon (1990) kun tamburisto Harvey Mason e gitaristo Lee Ritenour. Mason e Ritenour sugestis Nathan East. Pos laborar kun li dum kelka tempo, James sugestis ke li formacez bando, quo rezultis en la nuntempala jaz-quarteto Fourplay. La bando registragis plu kam dek albumi ed esis membrala chanji, gitaristo Larry Carlton remplasinta Ritenour e Chuck Loeb remplasinta Carlton. Fourplay celebris sua 25ma aniversario per la albumo Silver (2015).

Bob James e hip hop

La muziko da Bob James, aparte lua frua albumi, riuzesis ("sampled") ofte, aparte la kansoni "Nautilus" e "Take Me to the Mardi Gras".

"Nautilus" uzesis da Eric B. & Rakim en "Let the Rhythm Hit 'em", en "Beats to the Rhyme" da Run-D.M.C, "Daytona 500" da Ghostface Killah, "Jazzie's Groove" da DJ Jazzy Jeff, "My Mind Spray" da Jeru the Damaja, ed "Extradite" da Freddie Gibb. La baslineo di "Nautilus" aparis en "Children's Story" da Slick Rick.

"Take Me to the Mardi Gras" inkluzas "klosh-e-tamburo"-shablono qua esas bazala ritmo di hip hop.

Maxim famoze, la kansono di 1981 "Sign of the Times" uzesis da Warren G e Nate Dogg en sua disketo di 1994 "Regulate".