Concorde

De Wikipedio
Irez ad: pilotado, serchez
Aérospatiale-BAC Concorde
British Airways Concorde G-BOAC 03.jpg
Concorde de la kompanio British Airways.
Dati
Fabrikanto BAC (pose BAe e BAE Systems) e Sud Aviation (pose Aérospatiale ed EADS)
Motoro 4 turbini Rolls-Royce/Snecma Olympus 593
Periodo di uzado 1976 til 2003
Longeso 61,66 m
Kruzo-rapideso 2.180 km/h
Totalo fabrikita 20 unaji

Concorde esis pasajero-aeroplano qua flugis plu rapide kam sono.

Frua flugi[redaktar | redaktar fonto]

Esis du prototipi, e konstruktado di amba komencis en februaro 1965: la Franca, 001, esis konstruktata en Toulouse ed unesmfoye flugis ye 2 di marto 1969; la Britana, 002, esis konstruktata en Bristol ed unesmafoye flugis ye 9 di aprilo 1969. Ye 1 di oktobro 1969, Concorde 001 unesmafoye flugis plu rapide kam sono, dum olua 45ma flugo, pilotita da aeroplano-probisto Jean Pinet. Dum la 102ma flugo ol atingis duopla de la rapideso di sono, quon ol mantenis dum 53 minuti.

Dum la sequanta yari la aeroplano vizitis plura landi por reklamar olua qualesi ed atraktar kompranti. Ye 26 di septembro 1973, Concorde unesmafoye flugis sen-pauze trans la Atlantiko. La voyajo, de Washington DC a Paris, duris 3 hori e 32 minuti.

Reguloza flugi[redaktar | redaktar fonto]

Ol unesmafoye flugis reguloze ye 21 di januaro 1976, de London a Bahrain e de Paris a Rio de Janeiro.

Reguloza flugi komencis a John F. Kennedy-aeroportuo, ye New York, ye 22 di novembro 1977. Flugi di Concorde super Usa esis komence interdiktata pro la granda sono efektigata; ca interdikto esis pose revokata por Dulles-aeroportuo ye Washington DC, e plu tarde por JFK-aeroportuo.

Retreto[redaktar | redaktar fonto]

Concorde oficale retretis ye 24 di oktobro 2003. Retreto dil aeroplani esis anuncata ye 10 di aprilo 2003. Kauzi esis diminutata pasajero-nombri pos la mortiva acidento di 25 di julio 2000 en Francia, minmulta voyaji per aero pos la 9-11-ataki, e plu granda manteno-kusti. Franca Concorde facis finala flugo ye 27 di junio, e nun restas ye la Musée de l'Air proxim Paris. Britana Concorde, pos semano di adiala flugi en Britania, arivis ye Heathrow-aeroportuo ye 23 di oktobro pos lasta komercala flugo.

La lasta flugo di irga Concorde eventis ye 26 di novembro 2003 en Anglia, de l'aeroportuo di Heathrow a Bristol.