Everglades

De Wikipedio
Sudo di Florida kun la regiono Everglades.

Everglades esas naturala regiono di subtropikala marshi en la sudo di Usana stato di Florida.

La regiono komencas proxim Orlando, Florida apud la rivi dil fluvio Kissimmee, qua descharjas aden Lago Okeechobee. L'aqui qui ekfluas de la lago dum la pluvoza sezono formacas lenta fluvio, 97 km larje e 160 km longe, qua fluas til Florida-bayo en la sudo dil stato. Everglades subisas inundadi dum la pluvoza sezoni, e fairi dum la sika sezoni.

Klimato[redaktar | redaktar fonto]

La klimato di la regiono esas subtropikala, ed yarala mezavalora temperaturo varias de 16ºC til 27ºC. Dum la somero, la temperaturi ordinare superiras 32ºC. De aprilo til fino di oktobro eventas pluvoza sezono, qua koncentras 75% del yarala pluvi. Nur 25% del yarala pluvi falas de novembro til marto.

Historio[redaktar | redaktar fonto]

Homi ja habitis la sudo di Florida cirkume 15 000 yari ante nun. Du precipua tribui vivis en la regiono: Kalusa e Tequesta. Pos kontakto kun Hispaniani en fino dil 16ma yarcento la du tribui gradope desaparis. Indijeni Seminole, tribuo qua asimilis altra tribui, movis vers la regiono dum la fino dil 19ma yarcento, sub preso di Usana militisti, pos la Duesma Seminole-Milito.

Nacionala Parko[redaktar | redaktar fonto]

Nacionala Parko Everglades esas Usana Nacionala Parko en Florida qua protektas la sudala 20 procento del originala Everglades.