Fer-epoko

De Wikipedio
La mondo cirkume 1000 aK. La lineo reda montras loki ube fero ja uzesas dum ca epoko.
Fer-armi de la 7ma yarcento aK, de tale nomizita "kulturo Golasecca".

Fer-epoko esas periodo di la historio kande homo developis quale produktar ed uzar fero por fabrikar armi ed utensili. En multa anciena socii, la teknologii e habilesi por uzar fero aparis samatempe kam altra teknologii e kulturala transformi, inkluzite plubonigo di agrokultivala tekniki, modifiki en la religio ed en la arto.

Fer-epoko venis pos tale nomizita "Bronz-epoko", tamen sua aparo variis segun la regiono studiata. La maxim anciena exempli pri metalurgio di fero konocata aparis cirkume la 12ma yarcento aK, en plura loki:

  • Mez-Oriento
  • Anciena India (Veda-civilizuro, de 1500 aK til cirkume 500 aK)
  • Europa, dum tale nomizita arkaik-epoko Greka (1200 ak til 1100 aK).

En altra regioni Europana, l'uzo di fero komencis plu tarde, exemple central Europa komencis uzar fero erste depos la 8ma yarcento aK, ed en la nordo de Europa ol komencis uzesar erste depos la 6ma yarcento aK. En Afrika, la kulturo Nok, de Nigeria, komencis uzar fero depos la 9ma yarcento aK. Konvencione, la fino di fer-epoko judikesas kom l'epoko en ke skriburo komencis uzesar en Europa.