Inundadi e terglitadi en Rio de Janeiro ye januaro 2011

Domi destruktita dal inundado en Teresópolis.

En januaro 2011, violentoz inundadi e terglitadi atingis montala regiono dil stato Rio de Janeiro en Brazilia. Til la 27ma di januaro salveso esquadi trovis 844 korpi, ma la lokizo di 518 plusa homi oficale restis nekonocata specale kom konsequo di krulo di domi en Nova Friburgo, Petrópolis, Teresópolis, Sumidouro e São José do Vale do Rio Preto. Ta katastrofo ja esas konsiderata la duesma maxim mala di Braziliana historio: ol superiris la nombro di viktimi dil terglitado en Caraguatatuba en marto 1967 ma ne superiris la nombro di viktimi - kalkulita en 1700 morti - dil terglitado en la choseo Dutra ye la 22ma di januaro 1967. Inter la morti esas un ex-urbestro di Nova Friburgo, Paulo Cezar Vassallo de Azevedo.

Personi qui perdis lia domi dormas en gimnastikeyo en l'urbo Teresópolis. Voluntala profesionani helpas organizar l'atenco a la viktimi.

Til la 24ma di januaro plua kam 25 mili personi en 16 urbi del stato restis sen shirmilo. L'inundadi e terglitadi anke afektis serioze l'ekonomii dil urbi: multa stradi, voyi, butiki, farmeyi e fabrikerii destruktesis. Teresópolis, Petrópolis e Nova Friburgo havas turismo kom importanta ekonomial agado, e multa turistala substrukturi demandas rikonstrukturo.

Braziliana guvernerio reaktis rapide, e sendis incendio-pumpisti, policisti e militisti qui verkis en pacala trupi en Haiti por sokursar la populo, removar fango e roki de stradi e voyi ed instalar ambulanci e helpar en hospitali. Ye la 12ma di januaro prezidantino Dilma Rousseff anuncis R$ 780 milioni en helpi por la regiono. Til la 15ma di februaro plua kam 900 korpi ja trovesis da salveso esquadi. La verki por trovar korpi e rikonstruktar la subsstrukturo en l'afektita urbi duras til nun.

Singla urbo di la region, Areal, nur havis materiala detrimenti ma nula mortala viktimi, pro simpla decido di lua urbestro, Laerte Calil de Freitas: ilu demandis ke automobilo kun fono-buxi informis habitanti di la regioni apud fluvii pri balda intensa pluvi kun risko di inundadi. Habitanti di ta zoni abandonis lia domi justatempe.

Posibla origino: "La Niña"

Ta inundadi posible rezultis de intensa pluvi en la regiono, konsequo de naturala fenomeno konocata kom "La Niña". Dum la periodo dil fenomeno "La Niña", qua duras cirkume 5 monati, l'aquo dil centro ed esto dil Oceano Pacifiko standas 3 °C til 5 °C plu kolda kam l'ordinara mezvaloro por ta periodo. Ta variado en oceanala temperaturo afektas la klimato en tota mondo, en opozanta maniero a la fenomeno "El-Ninyo", qua esas la varmigo dil aquo di Pacifiko en la sama regiono, centro ed esto di Pacifiko.