Jimmy Hoffa
| James Riddle "Jimmy" Hoffa | ||
| ||
| Profesiono: | sindikatano | |
| Lando: |  Usa
| |
| Naskodato: | 14 di februaro 1913, 1912 | |
| Nasko-loko: | Brazil, Indiana, Usa | |
| Mortodato: | 1974, 30 di julio 1982 | |
| Morto-loko: | Loko ube desaparis: Bloomfield Township, Oakland komtio, Michigan, Usa | |
James Riddle "Jimmy" Hoffa (n. 14 februaro 1913; desaparis 30 julio 1975, deklarita mortinta 30 julio 1982) esis usana sindikatestro qua servis kom la prezidanto dil sindikato International Brotherhood of Teamsters (IBT) de 1957 til 1971.
De frua evo, Hoffa esis sindikat-aktivisto e divenis importanta regionala figuro che la IBT dum sua meza-20a yari. En 1952, il esis la nacionala vice-prezidanto dil IBT ed esis olua generala prezidanto inter 1957 e 1971. Il pleis granda rolo en la kresko e developeso dil sindikato, qua fine divenis la maxim granda (segun membraro) en Usa, kun plu kam 2,3 milion membri maxim alte, dum lua periodi kom duktero.
Hoffa konektesis kun organizita krimino de la frua yari di sua Teamsters-laboro, e ta konekto duris til lua desaparo en 1975. Il kondamnesis pri jurio-korupto, probita suborno, konspiro, e posto- e telegrafo-fraudo en 1964, per du aparta procesi. Il enkarcerigesis en 1967 e kondamnesis a 13 yari. En meza-1971, il demisionis kom prezidanto dil sindikato kom parto de redukto-akordo kun prezidanto Richard Nixon, ed il liberigesis plu tarde tayare, ma il interdiktesis de sindikat-aktivesi til 1980. Hoffa, esperinte riganar suporto e retrovenar a duktereso dil IBT, sensucese probis renversar l'interdikto.
Hoffa desaparis ye 30 julio 1975; lua kadavro nultempe trovesis. On deklaris ilu legale mortinta en 1982.
Frua vivo e sindikat-aktiveso
[redaktar | redaktar fonto]Hoffa naskis en Brazil, Indiana, ye 14 februaro 1913, a John e Viola (n. Riddle) Hoffa. Lua patro mortis en 1920 pro pulmono-morbo kande Hoffa evis sep yari. Lua matro esis de irlandana ancestri. La familio translojis a Detroit en 1924, ube Hoffa kreskis e lojis dum sua cetera vivo. Hoffa livis skolo evinta 14 yari e komencis plentempa manuala laboro quala domo-induto por helpar suportar sua familio. Hoffa mariajesis kun Josephine Poszywak, 18-yari-evinta laverio-laboristo de Detroit de polona ancestri, en Bowling Green, Ohio, ye 24 septembro 1936; la paro interrenkontrabis dum sen-sindikata striko da laverio-laboristi sis monati antee. Li genitis du filii; filiino, Barbara Ann Crancer, e filiulo, James P. Hoffa. Le Hoffa pagis $6800 en 1939 por modesta hemo en nordwesta Detroit. La familio plu tarde proprietis simpla somerala apudlaga dometo en Orion Township, Michigan, norde de Detroit.
Hoffa komencis sindikatala laboro per sua employeso kom adolecanto che nutrivo-butiko, employeso qua pagis subnormala salario ed ofris mala laboro-standi e minima sekureso. La laboristi desplezesis pri ta situeso e probis organizar sindikato por plubonigar sua stando. Malgre ke Hoffa esis yuna, lua kurajo ed afableso en ta rolo favore impresis lua kolegi, ed il acensis a dukteral ofico. En 1932, pos refuzir laborar por male-traktema submastro, qua inspiris longa kariero da Hoffa pri organizar laboristi, il livis la butiko, parte pro sua sindikat-aktivesi. Hoffa lore invitesis divenar organizero che filialo di le Teamsters en Detroit.