Joy Division

Joy Division esis angla rock-bando formacita en 1976 en Salford, Granda Manchester, Anglia.

Originale nomizita Warsaw, la bando konsistis ek kantisto Ian Curtis, gitaristo e klavaristo Bernard Sumner, bas-gitaristo Peter Hook, e tamburisto Stephen Morris.

Formacita da Sumner e Hook pos ke li asistis koncerto da le Sex Pistols, Joy Division balde movis preter sua punk-radiki por developar sono e stilo per qui li divenis pioniri di la pos-punk-movado di la tarda 1970 yari.

Lia su-editita 1978 debuto-disko di 1978, An Ideal for Living, atraktis atenco de Manchester-televizionulo Tony Wilson, qua signatis la grupo a sua sendependa kompanio Factory Records.  Lia debut-albumo Unknown Pleasures, registragita kun produktisto Martin Hannett, editesis en 1979 ed aklamesis.

Dum ke la bando plupopulareskis, kantisto Curtis sufris pro personala problemi qui inkluzis depreseso, falianta mariajo, ed epilepsio.  Por lu sempre plu desfacila esis plear "live"-koncerti, dum qui il kelkafoye sufris paraliz-ataki.  En mayo 1980, jus ante la komenco di lia unesma turo di Usa, Curtis suocidis, evinta 23 yari.  Lia duesma e finala albumo, Closer, editesis du monati pose; l'albumo e preirinta disketo "Love Will Tear Us Apart" esis lia maxim sucesoza diski.

Pos la morto di Curtis, la restinta membri duris kom New Order ed atingis kritikal e komercal suceso.  Malgre ke la kariero di Joy Division duris min kam quar yari, la bando duras influar diversa posa artisti.

Historio

Ye 20ma julio 1976, de-puera amiki Sumner e Hook aparte asistis koncerto da le Sex Pistols che Manchester Lesser Free Trade Hall.  Sequinta-die Hook pruntis £35 de sua matro por komprar sua unesma bas-gitaro.  Sumner pose dicis ke il sentis ke le Pistols "destruktis la mito di esar pop-stelo, ke muzikisto esas ulsorta deo quan on mustas adorar".  Inspirita da la pleo, Sumner e Hook formacis bando kun lia amiko Terry Mason, qua anke asistis la koncerto.  Sumner kompris gitaro, e Mason kompris tamburi.  Li invitis skol-amiko Martin Gresty esar kantisto, ma il refuzis nam il trovis employeso che lokala fabrikerio.  Reklamo pozesis en la Virgin Records-butiko en Manchester por kantisto.  Ian Curtis, qua konocis li de antea koncerti, respondis ed engajesis sen audo.  Sumner dicis ke il "savis ke Curtis esis afabla, e sur to ni fondis la grupo.  Se ni amis ulu, ni engajis lu".

Jeristo di le Buzzcocks, Richard Boon, e kantisto Pete Shelley probable sugests la nomo "Stiff Kittens", ma la bando adoptis la nomo "Warsaw" kurte ante sua unesma koncerto, refere la kansono da David Bowie "Warszawa".  Warsaw debutis ye 29 mayo 1977 che Electric Circus, suportanta le Buzzcocks, Penetration e John Cooper Clarke.  Li quik recevis nacional expozeso pro recensi dil koncerto en la NME (New Musical Express) da Paul Morley ed en Sounds da Ian Wood.

Tony Tabac pleis tamburi ta-vespere pos adherir la bando du dii antee.  Mason balde divenis la jeristo, e Tabac remplasesis ye tamburi en junio 1977 da Steve Brotherdale, qua anke pleis che la punk-bando Panik.  Dum lua tempo kun Warsaw, Brotherdale probis persuadar Curtis livar Warsaw ed adherar Panik, e mem persuadis Curtis audesar por Panik.   En julio 1977, Warsaw registragis kin "demo"-kansoni che Pennine Sound Studios en Oldham.  Desquieta pro la atakema personaleso di Brotherdale, la bando desengajis lu balde pos la "demo"-sesioni.  Vehinta adheme de la registrageyo, li haltis e pregis Brotherdale kontrolar roto-bandajo; kande il ekiris l'automobilo, li rapide forvehis.

Memorigo-stono di Ian Curtis en Macclesfield

En agosto 1977, la bando pozis reklamo en fenestro di muziko-butiko por nova tamburisto.  Stephen Morris, qua asistis la sama skolo kam Curtis, esis l'unika respondanto.  Deborah Curtis, spozino di Ian Curtis, asertis ke Morris "fitis perfekte" kun l'altri. e ke per adjuntar lu Warsaw divenis "kompleta 'familio'".  Por evitar konfundo kun punk-bando de London Warsaw Pakt, la bando rinomizis su Joy Division en frua 1978, preninta lia nova nomo de la sexuala sklaveso-fako di Nazista kampeyo mencionita en la romano di 1955, House of Dolls.

En decembro, la grupo registragis sua debutala EP-disko, An Ideal for Living, che Pennine Sound Studio e pleis sua finala koncerto kom Warsaw ye 31ma decembro che The Swinging Apple en Liverpool.  Reklamita kom Warsaw por certigar audantaro, la bando pleis sua unesma koncerto kom Joy Division ye 25ma january 1978 che Pip's Disco en Manchester.

Joy Division demandesis da RCA Records registragar la kansono "Keep on Keepin' On" da Nolan "N.F." Porter ed ofresis tempo che profesionala registreyo en Manchester.  Joy Division pasis tarda marto ed aprilo 1978 skribante e praktikante muziko.  Dum la Stiff/Chiswick Challenge-koncerto che Rafters Club en Manchester ye 14ma aprilo, la grupo atraktis atenco de Tony Wilson e Rob Gretton.  Curtis reprimandis Wilson pro ne invitir la grupo che lua programo che Granada Television, So It Goes; Wilson respondis ke Joy Division esos la nexta bando quan il estalos che TV.  Gretton tante impresesis da la bando, ke il konvinkis li engajar lu kom jeristo.

Gretton, qua esis "rezolvemega", kontributis la komercala habileso quin Joy Division indijis por furnisar a li fundamento por kreiveso.  Joy Division pasis l'unesma semano di mayo 1978 registragante che Arrow Studios en Manchester .  La bando esis deskontenta pro insisto dal chefo di Grapevine Records, John Anderson ke li adjuntez sintezilo a la muziko por moligar la sono, e demandis anulo dil kontrato quin li recente signatabis kun RCA.

Ye 18ma mayo 1980, ante l'aparo dil duesma albumo, Closer, e jus ante la projetita turo di Usa, Curtis pendis su dum askoltar la solo-albumo da Iggy Pop, The Idiot.  La albumo Closer egardesis kom la adio-albumo di Ian Curtis.  La disketo Love Will Tear Us Apart aparis pos lua morto, ed esas klar exemplo dil muzikala expresiveso di Joy Division.  Love Will Tear Us Apart divenis la maxim konocata kansono da Joy Division.

Pro ke la bandani konkordabis ke la bando devus dissolvesar se membro mortus, 18ma mayo 1980, la dio dil suocido da Ian, esis anke la dio kande Joy Division finis.  La cetera membri duris sub la nomo New Order.  Nova membro adheris, Gillian Gilbert.  L'albumo Movement aparis un yaro pos Closer.  New Order havis granda suceso per la kansono Blue Monday, la maxim vendita "12 inch"-disketo di omna tempo.  New Order sequis elektronikala direciono en pop-muziko  e divenis sucesoza grupo ed inspiris multa "house"-grupi di la 1990a yari.

Triesma albumo da Joy Division aparis en 1981, Still, kun "live"-plei e raraji.  En 1988 aparis kompilo-album Substance.  Ol kontenis plura kansoni da Joy Division, exemple Digital, Transmission e She's Lost Control.  En 1995 aparis plusa kompilo-albumo Permanent.  En 1997 aparis kolekturo da Joy Division, Heart And Soul, qua kontenis omna kansoni da Joy Division.

Diskografio

Albumi di ateliero

• Unknown Pleasures 1979
• Closer 1980

Ceneyo-albumi

• Preston 28 February 1980 (1999)
• Les Bains Douches 18 December 1979 (2001)
• Fractured Box (2001)
• Re-fractured Box (2004)

Kompilo-albumi

• Still (1981)
• Substance (1988)
• The Peel Sessions (1990)
• Warsaw (1994)
• Permanent (1995)
• Heart and Soul (1997)
• The Complete BBC Recordings (2000)
• Martin Hannett's Personal Mixes (2007)
• Let the Movie Begin (2007)
• The Best of Joy Division (2008)
• +− Singles 1978–80 (2010)
• Total: From Joy Division to New Order (2011)

EP-i

• An Ideal for Living (1978)
• The Peel Sessions (1986)
• The Peel Sessions (1987)

Single-i

• "Transmission" (1979)
• "Licht und Blindheit" (1980)
• "Love Will Tear Us Apart" (1980)
• "Komakino" (1980)
• "Atmosphere" / "She's Lost Control" (1980)
• "Love Will Tear Us Apart" (1980)
• "Atmosphere" (re-release) (1988)
• "Love Will Tear Us Apart" (1995)