Warszawa

De Wikipedio
Jump to navigation Jump to search
Warszawa
Warsaw montage.JPG
Kelk imaji pri Warszawa.
Flag of Warsaw.svg POL Warszawa COA.svg
Standardo di Warszawa Blazono di Warszawa
Lando: Flag of Poland.svg Polonia
Informo:
Latitudo: 52º14' N
Longitudo: 21º01' E
Altitudo: 100 m
Surfaco: 517.24 km²
Habitanti: 1 729 119[1] (2013)
Denseso di habitantaro: 2666,7 hab./km²
Horala zono: UTC+1
(UTC+2 dum somero)
Urbestro: Hanna Gronkiewicz-Waltz (PO)
Mapo:
Mapo di Warszawa
Oficala retosituo:
www.um.warszawa.pl
Rejala kastelo.

Warszawa esas la maxim populizita urbo di Polonia e la chef-urbo di la lando depos 1596, kande Sigmund la 3ma Vasa transferis ol de Kraków. Kun 1 729 119 habitanti en 2013[1] ol esas la 9ma maxim populizita urbo del Europana Uniono. Warszawa jacas apud la fluvio Vistula, cirkume 260 km de Baltiko.

Lua historiala centro rikonstruktesis detaloze pos la duesma mondomilito. En 1980 ol deklaresis Kulturala Patrimonio del Mondo dal UNESKO.

L'universitato di Warszawa inauguresis en 1816, e konsideresas la 2ma maxim importanta de Polonia. L'Universitato pri Teknologio di Warszawa, L'Universitato pri Medicino di Warszawa, L'Universitato pri Nacionala Defenso e la Muzikala Skolo Fredryk Chopin jacas inter la maxim prestijoza universitati di la lando.

Segun populala etimologio, lua nomo tradicionala "Warszawa" originis de "Warsz", nomo di un peskisto, e de lua spozino, la mar-homino "Sawe", qui esas simbolo dil urbo. Ma posible na nomo devenis del Polona vorto var (kastelo).

Historio[redaktar | redaktar fonto]

Kirko di Santa Maria, konstruktita en 1411.

Unesma fortifikita vilajeti konstruktesis en Bródno (dum la 9ma o 10ma yarcento) e Jazdów (dum la 12ma o la 13ma yarcento). L'urbo fondesis proxim la yaro 1300. Dum la 14ma yarcento lua precipua ekonomial agado esis mestiero e komerco.

L'unesma informi pri habitado da judi che l'urbo datizas de 1414. En 1526 la rejulo Sigmund la 1ma decidis persekutar li. Tamen, la ghetto dil urbo duris kreskar.

En 1529 Warszawa divenis unesmafoye la sideyo provizora dil Sejm (parlamento), e permananta pos 1569. En 1573 kreesis la Kunfederuro di Warszawa, qua establisis religiala libereso en Polonia-Lituania. Pro lua geografiala loko inter Kraków e Vilnius, chef-urbi di la komunitato Polona-Lituana, Warszawa divenis chef-urbo di la Krono dil Rejio di Polonia kande la rejulo Sigmund la 3ma Vasa movis lua korto vers l'urbo en 1596.[2]

Warszawa en 1573.

En 1571 signatesis l'Uniono di Lublin, en ke la Republiko di la Du Nacioni deklaris ke omna renkontri di la membri dil Sejm eventus en Warszawa. Pos 1573, omna rejala elekti eventis en l'urbo. Ta yaro inauguresis l'unesma ponto super la fluvio Vistula, qua konstruktabis pos 1568. Ica ponto destruktesis en 1603, pro inundado.

Sigmund la 3ma Vasa decidis transferar la chef-urbo dil rejio a Warszawa en 1595 pos ke incendio destruktis la rejala kastelo di Kraków, ed anke pro strategiala motivi: ultre distar egale de Kraków e Vilnius, Warszawa distas poke (284 km en rekta lineo) de la portuo di Danzig, qua sempre minacesis dal Suedi[3]. En 1602, forta venti destruktis la turmo di la katedralo, ed en 1607 incendio destruktis la centrala placo dil urbo.

En 1611, por komemorar la vinko dil caro Rusa Basil la 4ma en Smolensk, la chef-urbo dil rejio transferesis definitive a Warszawa. Dum la sequanta yari, l'urbo expansis vers la suburbi, ma la kresko interuptesis pro serio di invadi dal Suedi. De 1624 til 1625, ed itere de 1652 til 1653 la pesto devastis la habitantaro. De 1655 til 1658 Warszawa asiejesis e spoliesis tri foyi dal Suedi, Brandenburgiani e Transilvaniani. Multa libri ed artala e historiala objekti furtesis dal invaderi. Tamen, pos ke l'Otomani vinkesis en la batalio di Kahlenberg en 1683 dum la regno di Jan la 3ma Sobieski, l'urbo rekuperis lua anciena prospereso.[4]

En 1700 komencis la Granda Nordala Milito, e Warszawa okupesis multa foyi. En 1702 Sueda trupi komandita dal rejulo Karl la 12ma kaptis l'urbo. En 1704 la rejulo August la 2ma di Polonia fugis, e la parlamento (Sejm) selektis Stanislaw la 1ma Leszczynski, federito al Suedi, por sucedir il. August la 2ma federis kun Rusa imperio en Narva la yaro 1704 ed eniris en milito. Ilu probis konquestar Warszawa ye la 21ma di julio 1705 por impedir la kronizo di Stanislaw, sensucese.

La tri dividi di Polonia: 1772, 1793 e 1795.

Pos la milito, Warszawa duris prosperar. En 1747 inauguresis la biblioteko Załuski, l'unesma publika biblioteko di Polonia, e lor la maxim granda de Europa. Stanisław la 2ma Augustus Poniatowski rimodlis la rejala kastelo e transformis l'urbo en centro por kulturo ed arti. Warszawa duris esar chef-urbo di Polonia-Lituania til 1795, kande la lando subisis lua triesma divido e cesis existar. L'urbo anexesis a Prusia.[5]

En 1806 Napoléon la 1ma konquestis Prusia, liberigis Warszawa, e transformis ol en chef-urbo dil dukio di Warszawa. Pos la Kongreso di Wien en 1815, ol divenis chef-urbo dil Cario di Polonia, konstitucala monarkio sub personal uniono kun Rusa imperio. La rejala universitato di Warszawa kreesis en 1816.

Generalo Henryk Dembiński eniras Warszawa en 1831.

Pos plura violaci di Polona konstituco dal Rusi, en novembro 1830 eruptis revolto. Pos la Rusa-Polona milito di 1831 la revolto vinkesis e l'autonomio dil cario diminutesis. Ye la 27ma di februaro 1861 Rusa trupi pafis kontre protesteri en Warszawa e mortigis 5 personi. Dum la revolto di 1863 til 1865 l'urbo esis chef-urbo dil sekreta guverno nacionala di Polonia.

L'urbo prosperis de 1875 til 1892, dum l'administrado dil urbestro Sokrates Starynkiewicz, Rusa generalo qua expansis la sistemo di tramveturi, aquodrenili e kloaki, lumizo di la stradi e distributo di aquo e gaso. Segun la demografiala kontado di 1897, Warszawa havis 625 000 habitanti, ed esis la 3ma maxim populizita urbo di Rusa imperio, pos Sankt Petersburg e Moskva.

Aeronavo Germana bombardas Warszawa en 1914, dum l'unesma mondomilito.

Dum l'unesma mondomilito, Warszawa okupesis dal Germani de la 4ma di agosto 1915 til novembro 1918. L'armistico qua finis la milito demandis Germana retreto de omna teritorii kontrolita da Rusia en 1914, inkluzinte Warszawa. Germani facis to, ed ye la 14ma di novembro 1918, Polona generalo Józef Piłsudski proklamis la Duesma Polona Republiko, kun chef-urbo en Warszawa. Dum la Polona-Sovietiana milito di 1920 eventis feroca batalio en lua suburbi, en ke la Reda Armeo subisis granda perdaji e vinkesis. To impedis l'"exportaco" di Rusa revoluciono a Polonia.

En 1925, Warszawa havis 1 milion habitanti, e duris esar importanta kulturala centro. Pos 1927 ol gastigis internaciona konkursi por pianisti homaje a Frédéric Chopin. Malgre l'efekti di la granda depreso ekonomiala di 1929, nova industrii automobilala ed aeronavala instalesis.

La centro di Warszawa pos bombardo Germana en septembro 1939.

Pos l'invado di Polonia dal Naziisti, Warszawa rezistis til la 27ma di septembro 1939. La centro di Polonia inkluzite Warszawa pozesis sub la Generala Administrado, kolonial okupeso dal Germani. Omna universitati e fakultati klozesis e la judi dil urbo - preske 30% de la habitantaro - amaseskis che la ghetto di Warszawa.[6] L'urbo divenis centro por urbala rezisto kontre Germani en central Europa. Kande Hitler imperis "la finala solvo" ye la 19ma di aprilo 1943, la Judi komencis la Sedicio dil Ghetto qua, malgre la mikra quanto di kombatinti e di armi, duris dum 1 monato. Kande la lukto finis, preske omna transvivinti masakresis, e poke fugis o celis.

Warszawa en januaro 1945, pos la fugo dil Naziisti.

En julio 1944, la Reda Armeo eniris Polona teritorio e persequis Germani vers Warszawa. La guverno di Polonia exiliita en London savis ke Stalin esis desfavoroza al ideo pri nedependanta Polonia, do decidis lansar atako por liberigar l'urbo[5] ye la 1ma di agosto 1944. On kalkulas ke 150 mil til 180 mil Warszawiani mortis dum la kombati. Entote, 600 mil til 800 mil habitanti dil urbo mortis dum la milito,[5] e 30% del urbo destruktesis. Ambe Hitler e Himmler motrabis deziri pri destruktar l'urbo,[7] e kande Germana trupi imperesis abandonar ol, li destruktis 80% til 85% del urbo, inkluzite l'Anciena Urbo e la Rejala Kastelo. Li nur prezervis la ferovoyi, por evakuar la trupi.

Turisto proxim la Palaco pri Kulturo e Cienco, en 1965.

Sovietiani eniris Warszawa en januaro 1945, ed ye la 1ma di februaro sam yaro, la Republiko Populala di Polonia proklamesis, e balde komencis la rikonstrukto dil urbo. Granda projeti di edifici rezidala konstruktesis, por remplasar la habiteyi destruktita. Altra edifici tipala de la komunista landi, exemple la Palaco pri Kulturo e Cienco anke konstruktesis. Warszawa itere divenis chef-urbo di Polonia e la politikala ed ekonomiala centro di la lando. Lua historiala quartero rikonstruktesis, ed en 1989 ol deklaresis Mondala Patrimonio di la Homaro, dal UNESKO.[8] En 1955 la militala Pakto di Warszawa signatesis da Sovietia e lua federiti che la urbo.

En 1979 ed itere en 1983, papo Ioannes Paulus la 2ma vizitis l'urbo, e suportis la movado dil sindikato Solidareso qua demandis politikala reformi. La diskurso dil papo, "Facez tua spirito decensar e rinovigar la facio di la tero, ica tero!" interpretesis quale suporto a liberala e demokratiala reformi.

En 1995 inauguresis l'unesma lineo dil metropoliteno di Warszawa. La duesma lineo inauguresis en 2015. Pos l'eniro di Polonia che l'Uniono Europana en 2004, l'urbo subisabas la maxim granda kresko de lua historio.

Geografio[redaktar | redaktar fonto]

Noktala panoramo pri Warszawa.
Noktala panoramo pri Warszawa.
Satelital imajo pri Warszawa.
Parko Skaryszewski.

Warszawa jacas an la centro di Polonia, cirkume 300 km de Karpati, 260 km sude de Baltiko e 523 km este de Berlin.[9] Ol jacas an la planajo di Mazovia, apud la du rivi dil fluvio Vistula, qua fluas sude til norde. Lua mezavalora altitudo esas 100 metri adsur la maro. Este de Vistula la sulo konsistas ek moreni, alta de 10 til 25 m adsur la normala nivelo dil fluvio, dum ke la sulo dil lito di Vistula iras til 6,5 m adsur lua normala nivelo. Ne existas alta kolini che la urbo: la maxim alta naturala kolino dil urbo an l'estala rivo jacas 115.7 metri adsur la maro. An la westala rivo, la maxim alta kolino jacas 122.1 metri adsur la maro. L'artificala kolino Szczęśliwice jacas 138 metri adsur la maro, ed esas la maxim alta punto dil urbo.

La klimato di Warszawa esas humida kontinentala, kun kolda vintri (la mezavalora temperaturo en januaro esas -2,4°C) e varma, sunoza e pluvoza someri (mezavalore 19,1°C en julio, ma povas atingar 30°C). Inundadi povas eventar dum la maxim pluvoza monati (junio til agosto). Warszawa esas la 4ma maxim sika chef-urbo Europana, kun mezavalora yarara pluvozeso di 529 mm.

La verda arei kovras 1/4 ek la surfaco dil urbo, inkluzite urbala boski e prezervata arei. Existas 82 parki che l'urbo. La maxim anciena esas gardeni di palaci, exemple la palaco Krasiński, la parko Łazienki, e la parki dil palaci Wilanów e Królikarnia. La parko Łazienki kreesis en 1780, ed ankore existas arbori del epoko di lua kreado. Distante 15 km de la centro di Warszawa, l'ekosistemo dil fluvio Vistula esas perfekte prezervata, e permisas la vivo di koypi, kastori e multa speci di uceli.

Publika transporto[redaktar | redaktar fonto]

Staciono Plac Wilsona ("placo Wilson") dil metropoliteno (lineo 1).
Tramveturo che la strado Marszałkowska.

La sistemo di publika transporto en Warszawa inkluzas la du linei di metropoliteno, autobusi, tramveturi e suburbala treni. Dum la yari 1970ma cirkume 90% de la habitantaro uzis publika transporto, ma ta procento diminutis til 64% dum la yari 1990ma ante l'inauguro dil metroo, pro l'antiqueso di la vehili.

Nun existas 170 linei di autobusi che l'urbo, qui parkuras entote 2063 km kun cirkume 1600 vehili. La lineo "100" esas turistala, e funcionas nur dum la semanofini. Ol esas l'unika lineo qua uzas autobusi du-etaja. De noktomezo til 5:00 kloki funcionas noktala linei, qui atendas anke la suburbi.

L'unesma lineo di tramveturo dil urbo inauguresis ye la 11ma di decembro 1866. Dum l'epoko inter la du mondomiliti, la sistemo di tramveturi kreskis multe. La sistemo destruktesis dal Germani pos la revolto di 1944. Ye la 20ma di julio 1945, l'unesma lineo rikonstruktita inauguresis. La sistemo subisis expanso til la yari 1960ma, kande expansesis la sistemo di autobusi, qui uzis Sovietiana kombustivo. Nune existas 863 tramveturi che l'urbo qui parkuras entote 20 linei. La sistemo subisabas modernigo pos l'eniro di Polonia en l'Uniono Europana.

La diskuti pri adopto di metroo en Warszawa komencis en 1925, ma nur en 1995 inauguresis l'unesma 11 km-a lineo, qua komencis konstruktesir en 1985. Nune la sistemo havas du linei (la duesma inauguresis en 2015) kun entote 23 km e 21 stacioni.

En 1845 inauguresis lineo di treni inter Warszawa e Wien. Nune la maxim granda staciono esas Warszawa Centralna, qua konektesas al metroo.

Du aeroportui servas Warszawa: l'aeroportuo Chopin (Lotnisko Chopina) distas 10 km del centro dil urbo, qua koncentras 40% ek l'aerala transporto di Polonia (plua kam 11 milion personi transportesas omnayare); e l'aeroportuo Modlin, antee milital aerodromo e nune la 5ma maxim uzata aeroportuo di Polonia (2 932 639 personi transportita en 2017, nun exkluzive dal kompanio Ryanair[10]).

Warszawa anke kreis multa chosei exkluziva por bicikli ed adoptis sistemo di partigo di bicikli, nomizita "Veturilo": l'uzeri mustas komence pagar 10 złoty ed enrejistresar en la sistemo. L'unesma 20-minuta uzado esas sen plusa kusto, ed uzar plusa tempo kustas adminime 1. Singla biciklo povas uzesar admaxime dum 12 hori. Existas 4.660 bicikli disponebla en ta sistemo.

Turismo[redaktar | redaktar fonto]

Varszawa havas multa monumenti, parki, 60 muzei ed altra loki vizitebla por turisti. Kelka exempli esas:

La Rejala Kastelo di Warszawa.
  • La Rejala Kastelo di Warszawa, konstruktita dum la 14ma yarcento, ol esis rezideyo di la rejala familio e sideyo dil parlamento. Dum la 19ma yarcento, mult objekti transportesis a Rusia, ma retrodonesis a Polonia pos la nedependo en 1918. L'edifico bombardesis e destruktesis komplete dal Germani dum la duesma mondomilito. Ol rikonstruktesis pos la milito ed inauguresis por viziteri en 1984.[11]
  • La Monumento pri la Revoltinti - konsistanta ek du skulturi, ol homajas la heroi qui luktis kontre Germana okupeso en 1944. Un ek la skulturi montras soldato enirante la sistemo di kloaki dil urbo, por eskapar la Naziisti. Proxim la monumento existas mikra muzeo kun fotografuri pri la revolto.[11]
  • La Muzeo Frédéric Chopin montras letri ed objekti qui rakontas la vivo dil kompozisto.[11]
  • La strado Nowy Swiat e la historiala centro di Warszawa, kun edifici restaurita pos la duesma mondomilito.[11]
La murego di Warszawa.
  • La murego konstruktita en 1540 por protektar l'urbo anke jacas an la historiala quartero. Proxim la murego, statuo homajas pueri qui kombatis kun armi kontre German okupeso en 1944.[11]
  • La parko Łazienki esas la maxim granda publika parko de Warszawa. En ol jacas multa statui, gardeni e lagi.[11] La Palaco an l'Insulo (Pałac na Wyspie) jacante an la parko, esis somerala resideyo por la lasta rejo di Polonia, Stanisław August Poniatowski. Nune ol esas la Muzeo pri Nuntempal Arto dil urbo.
  • La Teatro Wielki, o Granda Teatro di Warszawa. Inaugurita en 1833 e preske komplete destruktita dum la duesma mondomilito, ol rikonstruktesis pos la milito e riinauguresis en 1965. Kompozisti quale Ignacy Jan Paderewski, Karol Szymanowski, Władysław Żeleński ed altri facis spektakli hike.
  • La zoo di Warszawa okupas 40 hektari e gastigas cirkume 5.000 animali de 500 speci. Ol kreesis en 1929.
  • La Muzeo Carroll Porczyński prezervas la maxim granda privata kolektajo pri arti de Polonia, kun pikturi de Peter Paul Rubens, Francisco Goya, John Constable, Pierre-Auguste Renoir, Vincent van Gogh e Salvador Dalí, inter altri.[12]
Palaco pri Kulturo e Cienco di Warszawa.
  • La Palaco pri Kulturo e Cienco konstruktesis de 1952 til 1955.[11] Alta de 237, ol duras esar la maxim alta edifico del urbo, e gastigas multa kultural agadi, teatrala kompanii, cinemi, loki por koncerti, edc. Ol anke esas sideyo dil Akademio Polona pri Cienci.

Fratala urbi[redaktar | redaktar fonto]

Referi[redaktar | redaktar fonto]

  1. 1,0 1,1 Population in Poland. Size and structure by territorial division as of December 31, 2013 (en Polona). (ASPX) URL vidita ye la 2ma di oktobro 2013.
  2. Warsaw's history. e-warsaw.pl. URL vidita ye la 24ma di julio 2008.
  3. Davies (2005) - God's Playground - . God's Playground (en Angla). En la Angla
  4. Warsaw City Hall. Warsaw's history (en Angla). URL vidita ye la 13ma di marto 2009.
  5. 5,0 5,1 5,2 Encyclopædia Britannica Online. Warsaw (Poland) (en Angla). URL vidita ye la 13ma di marto 2009.
  6. Warsaw. United States Holocaust Memorial Museum. URL vidita ye la 29ma di julio 2008.
  7. Włodzimierz Borodziej, Barbara Harshav (2006) - The Warsaw Uprising of 1944 - . The Warsaw Uprising of 1944 (en Angla). Univ of Wisconsin Press. En la Angla
  8. Historic Centre of Warsaw. whc.unesco.org. URL vidita ye la 24ma di julio 2008.
  9. Geography of Warsaw. geography.howstuffworks.com. URL vidita ye la 27ma di februaro 2009.
  10. http://en.modlinairport.pl/modlin-en-new/web/passenger/airlines/ryanair.html
  11. 11,0 11,1 11,2 11,3 11,4 11,5 11,6 Gabi Moniz e Fabrício Faria. Turismo em Varsóvia: o que conhecer na capital da Polônia (en Portugalana). Projeto 101 Países. URL vidita ye la 3ma di februaro 2018.
  12. Museum of John Paul II Collection (en Angla). URL vidita ye la 24ma di agosto 2009.
  13. Berlin – City Partnerships. Der Regierende Bürgermeister Berlin. URL vidita ye la 17ma di septembro 2013.
  14. Berlin's international city relations. Berlin Mayor's Office. URL vidita ye la 1ma di julio 2009.
  15. Listado de ciudades hermanas (en (Hispana)). buenosaires.gov.ar. Gobierno de la Ciudad de Buenos Aires. URL vidita ye la 15ma di oktobro 2011.
  16. Griffin, Mary (2ma di agosto 2011). Coventry's twin towns. Coventry Telegraph. URL vidita ye la 6ma di agosto 2013.
  17. Coventry – Twin towns and cities. Coventry City Council.. URL vidita ye la 6ma di agosto 2013.
  18. Twin Towns. amazingdusseldorf.com. URL vidita ye la 29ma di oktobro 2009.
  19. Sister Cities of Istanbul. URL vidita ye la 8ma di septembro 2007.
  20. Erdem, Selim Efe (3ma di novembro 2003) - İstanbul'a 49 kardeş - . İstanbul'a 49 kardeş (en Turkish). Radikal
  21. Mapa Mundi de las ciudades hermanadas. Ayuntamiento de Madrid.
  22. Partners – Oslo kommune. oslo.kommune.no.
  23. Twin cities of Riga. Riga City Council. URL vidita ye la 27ma di julio 2009.
  24. Saint Petersburg in figures – International and Interregional Ties. Saint Petersburg City Government. URL vidita ye la 23ma di marto 2008.
  25. International Cooperation: Sister Cities. Seoul Metropolitan Government. seoul.go.kr. URL vidita ye la 26ma di januaro 2008.
  26. Seoul -Sister Cities [via WayBackMachine]. Seoul Metropolitan Government. URL vidita ye la 23ma di agosto 2013.
  27. url=https://web.archive.org/web/20140410023801/http://www.edunet.taipei.gov.tw/attach/The%2045%20Sister%20Cities%20list.doc
  28. Tel Aviv sister cities (en Hebrea). Tel Aviv-Yafo Municipality. URL vidita ye la 14ma di julio 2009.
Commons
Commons havas kontenajo relatante a:
Chef-urbi di Europana landi

Amsterdam · Andorra la Vella · Athina · Belgrade  · Berlin · Bern · Bratislava · Bruxel · Budapest · Bucarest · Dublin · Helsinki · Kiev · Chisinau · København · Lisboa · Ljubljana · London · Luxemburg · Madrid · Minsk · Monako · Moskva · Nikosia · Oslo · Paris · Podgorica · Praha  · Reykjavík · Riga · Roma · San-Marino · Sarajevo · Skopje  · Sofiya · Stockholm · Tallinn · Tbilisi · Tirane · Vaduz · Valletta  · Warszawa · Vatikano · Wien · Vilnius · Yerevan · Zagreb