Prater di Wien

De Wikipedio
Salti al navigilo Irez a serchilo
Prater di Wien

Prater di Wien esas granda publika parko en la duesma distrikto (Leopoldstadt) di Wien, Austria.

La Wurstelprater, amuzo-parko ofte simple nomizata "Prater", jacas en un angulo dil Prater, ed inkluzas la rotego Wiener Riesenrad.

La nomo Prater devenas de sive l'una sive l'altra, o forsan amba Latina vorti pratum (prato) e Praetor (judiciisto o legisto), posible per Hispana prado od Italiana prato.

L'areo di la moderna Prater unesme mencionesis en 1162, kande Imperiestro Friedrich I donis la tereno a nobela familio kun la nomo de Prato.  La vorto "Prater" unesme uzesis en 1403, originale referinta mikra insulo en la Danubio norde de Freudenau, ma ol gradope extensesis a signifikar la vicina arei anke.

La tereno chanjis proprieteso freque til ke ol kompresis da Imperiestro Maximilian II en 1560 por esar chaseyo.  Por traktar la problemo di furto-chaseri, Imperiestro Rudolf II interdiktis eniro a la Prater.  Ye 7 aprilo 1766, Imperiestro Josef II deklaris ke la Prater esas libera por publika juo, e permisis l'establieso di kafeerii, quo duktis al komenco di la Wurstelprater.  Tra ta tempo, chaso duris eventar en la Prater, e finis erste en 1920.

En 1873, Mondo-Expozo eventis che la Prater, por qua grand areo de tereno rezervesis, cirkum la Rotunda, qua brulis en 1937.  Ta tereno nun kontenas la Messegelände (expozo-centro).

Sur la tereno dil moderna Kaiserwiese, atraktivo kun la nomo "Venezia en Wien” establisesis en 1895 da Gabor Steiner.  L'areo inkluzis artificala laguno por simular la kanali di Venezia, Italia.

En 2004, granda rinovigi dil Wurstelprater komencis, e nova subtera fervoyo kompletigesis e serveskis ye 11 mayo 2008, qua inkluzas tri halteyi alonge la Prater.   La staciono Wien Praterstern esas operacanta dum longa tempo e distas nur poka dozeni de metri de enireyo a la parko.

La Hauptallee (chef-avenuo) esas la precipua arterio, kun linei de maronieri, klozita ad automobili, e konocata da sport-entuziasmanti pro la yarala Maratono di Wien.  La Prater esas la hemo di la fervoyo Liliputbahn.  Altra nenormala objekto trovebla en la Prater esas la Republik Kugelmugel , sferatra "mikra-naciono".  La Prater anke kontenas *planetario e la Prater-Muzeo.