Shablono:Eventi/18 di oktobro
Venera 4
|
- 1356. Tertremo eventis ye la urbo Basel en Suisia. Esis granda shoko dum la vespero di ca dio, e plura sequanta shoki. La urbo esis destruktata, e cirkume 300 homi mortis. Kasteli e kirki til disto 30 km de Basel esis destruktata; la tertremo esis sentata en Zürich e Konstanz. Ol esis la maxim granda tertremo en centrala Europa dum historiala tempi.
- 1905. En Köln, la simfonio no. 5 da Gustav Mahler esis unesmafoye pleata, direktata da la kompozisto. Il komencis kompozar ol dum somero 1901 ye ilua vakancala dometo ye Maiernigg en Karintia, Austria, ed ol esis kompletigata en 1902. Dum ta periodo il renkontris Alma Schindler, e li esis mariajata en marto 1902. La simfonio havas kin movimenti: la unesma esas funero-marcho; la quaresma esas la famoza adagietto por harpo e kordeti, kontrastanta a la altra movimenti; la lasta esas joyoza ed orkestrale komplexa konkluzo.
- 1967. Venera 4, kosmosondilo di USSR, arivis ye la planeto Venuso. Ol lansesis ye 12 di junio 1967. Dum ke ol proximeskis Venuso, la segmento por explorar la planeto separis su e falis tra la atmosfero, lentigata da parafalo. Dum 93 minuti ol transmisis informeso pri la atmosferala preso e temperaturo; transmisi cesis ye alteso 27 km, la alta preso aplastante la probilo. La informeso sugestis ke, ye la surfaco, temperaturo esas 500 gradi e preso esas 75-foyi di Terala preso. Venera 4 esis la unesma probilo qua sendis informeso de la atmosfero di altra planeto.