Smells Like Teen Spirit

De Wikipedio
Salti al navigilo Irez a serchilo
Nirvana-Smells-Like-Teen-Spirit.png

Smells Like Teen Spirit esas kansono de 1991 dal usana grunge-bando Nirvana, qua editesis kom la chef-disketo de lia duesma albumo Nevermind.

La kansono skribesis da Kurt Cobain, Dave Grohl e Krist Novoselic, e Nirvana enorme progresis danke ta disketo.  "Smells Like Teen Spirit" atingis numero 1 en la rangi di Usa, Nova-Zelando, Francia e Belgia ed anke ganis platino-atesto del Recording Industry Association of America.

"Smells Like Teen Spirit" egardesas kom la kansono qua popularigjs alternativa rock kom jenro komence dil 1990-yari ed ol anke deskriptesis kom himno por Generaciono X.  Nirvana pleis "Smells Like Teen Spirit" unesmafoye ye 17 aprilo 1991 che OK Hotel en Seattle, Washington e kelka monati pose registragis ol che Sound City Studios en Van Nuys, Kalifornia kun produktisto Butch Vig.

Cobain konceptis la titulo dil kansono kande lua amiko Kathleen Hanna spricigis la vorti "Kurt smells like Teen Spirit" sur ilua muro.  Hanna intencis ke Cobain odoris quale la senodorigilo Teen Spirit, to quon Cobain saveskis erste kelka monati pos l'editeso dil kansono. La video-filmo por "Smells Like Teen Spirit" direktesis da Samuel Bayer ed esis la unesma muziko-video quan il direktis.  Cinematografo eventis ye 17 agosto 1991 che GMT Studios en Culver City, Kalifornia ed en la filmo Nirvana pleas yunuli en gimnastikeyo di skolo.  Ye la fino on destruktas l'estradi e destruktas anke la instrumenti dil bando.  La video-filmo, quale la kansono, recevis pozitiva kritiko.  David Fricke di Rolling Stone deklaris ke la pleo da Nirvana esis un ek la maxim bona en irga muziko-video, ed Amy Finnerty di MTV deskriptis ol kom "revolucionala".

En 2000 la Guinness Book of Records deklaris la video-filmo di "Smells Like Teen Spirit" kom la maxim pleita muziko-video di omna tempo che MTV Europe, e VH1 rangizis olua mondala unesma pleeso ye numero 18 en sua listo "100 Greatest Rock & Roll Moments on TV".