Spokane, Washington

De Wikipedio
Spokane

Spokane esas urbo en komtio Spokane en la stato Washington en nordwesta Usa.

L'urbo situesas en estala Washington alonge la rivero Spokane, adjacanta la Selkirk-Monti e weste de la Rocky-Monti - 148 km sude de la frontiero inter Kanada ed Usa, 30 km weste de la frontiero inter Washington ed Idaho, e 449 km este de Seattle alonge l'autovoyo Interstate 90.

Konocata kom la naskeyo di Patro-Dio, l'oficala surnomo di Spokane esas la "Lilac City" (Lilaco-Urbo).  Rozea, duopla-flora varianto dil ordinara lilaco, konocata kom Syringa vulgaris 'Spokane', esas nomizita pro l'urbo.

Ol esas la sideyo di komtio Spokane e l'ekonomial e kultural centro dil metropolala areo Spokane, dil areo Spokane-Coeur d'Alene, e la Interna Nordwesto.  L'urbo, kun la tota Interna Nordwesto, servesas dal aeroportuo Spokane International Airport, 8 km weste de centrala Spokane.

En 2010 Spokane havis habitantaro de 208.916, tale ol esas la duesma maxim granda urbo en stato Washington, e la 100ma maxim granda urbo en Usa.

L'unesma habitanti dil areo, la tribuo Spokane sustenis su per abundanta vildo.  David Thompson exploris l'areo ed establisis Spokane House dil North West Company en 1810.  Ta faktorio esis l'unesma longa-tempa europana kolonio en stato Washington.  La kompletigeso dil fervoyo Northern Pacific Railway en 1881 atraktis koloniani a Spokane.  Samayare ol oficale divenis urbo kun la nomo Spokane Falls (ol adoptis sua nuna nomo dek yari pose).

Dum la tarda 19ma yarcento, oro ed arjento deskovresis en la Interna Nordwesto.  La lokala ekonomio dependis de minado, ligno, ed agrokultivo til la 1980a yari.  Spokane gastigis l'unesma ambiento-tema Mondo-Ferio che Expo '74.

Multa anciena edifici en centrala Spokane desegnesis dal arkitekto Kirtland Kelsey Cutter pos la Granda Fairo di 1889.  En l'urbo anke trovesas la parki Riverfront e Manito, la muzeo Northwest Museum of Arts and Culture, la Davenport-Hotelo, e la teatri Fox e Bing Crosby.