Stine Jensen
| Stine Jensen | ||
.jpg)
| ||
| Okupeso: | Filozofo, skriptisto | |
| Lando: |  Dania
| |
| Naskodato: | 13 di januaro 1972 | |
| Nasko-loko: | Hillerød, Dania | |
| Retoloko: | http://www.stinejensen.nl/ | |
Stine Jensen (Hillerød, 13ma di januaro 1972) esas Danian-Nederlandana filozofo e skriptisto. El naskis en Dania, ma ja ante elua unesma aniversario venis kun sua genitori e jemelo-fratino Lotte Jensen a Nederlando, pro ke elua patro ibe trovis laboro. El ankore havas la Dana nacionaneso.
Stine Jensen studiis literaturala cienci (diplomizesis “Honoroze”) e filozofio en la Statal Universitato Groningen. Inter 2002 e 2007 el voyajis inter Amsterdam ed Istanbul; el kurta-friste habitis la Turka chefurbo por skribar elua libro “Turkse vlinders” pri interkultural amoro-relati. El anke esis docisto en la Vrije Universiteit (Amsterdam).
Jensen skribis plura libri, de filozofala perspektivo. Por HUMAN (brodkasterio) el produktis depos 2008 ok serii di la programo Dus ik ben (Do me esas), pri omna aspekti di la filozofio. En 2013 el produktis la quar-episoda serio Licht op het Noorden (Lumo sur la Nordo) por la VPRO (brodkasterio) ed HUMAN, en qua el exploras la vivo en Skandinavia (rispektive Dania, Suedia, Finlando e Norvegia). Samatempe aparis sam-titula libro.
Por elua infanto-libro Lieve Stine, weet jij het? (Kara Stine, ka tu savas lo?) el recevis en 2015 la premio Zilveren Griffel. En ca libro el ligas la relato inter questioni di infanti a la verko di la granda filozofi.
Stine Jensen praktikas yogo ed olime esis fanatik ateisto, nun el konsideras su kom ‘gay’ ateisto.