Thierry Baudet

De Wikipedio
Salti al navigilo Irez a serchilo
Thierry Baudet

Thierry Henri Philippe Baudet (n. Heemstede, 28 januaro 1983) esas nederlandana politikisto, skribisto e yuristo.

En 2015 il fondis Forum voor Democratie (FvD) kom penso-tanko; en 2016 FvD transformesis a politikala partiso kun Baudet kom duktero.  Pos la Nacionala Elekto di 2017 Baudet divenis la partiso-duktero di FvD en la Duesma Chambro di Nederlando.

Baudet esas nepoto dil profesoro di sociala ed ekonomiala historio e la milito-korespondanto Ernest Henri Philippe Baudet.  La patro di ca lasta esis la matematikisto Han Baudet.  Baudet naskis en Heemstede a familio de parte walona ed indoneziana ancestri.

Baudet esas euroskeptiko ed opozas multakulturalismo.  Baudet favoras retroiro a nacion-stati.  En 2014 il diskursis che la Flandriana nationalista evento IJzerwake.  Il anke diskursis che plura konferi di Vlaams Belang.  Baudet asertis ke lua konservema politikala opinioni grandaparte influesis da du eventi dum lua unesma yaro kom historio-studento en Amsterdam: l'ataki di 11 septembro, e l'asasineso di Pim Fortuyn.

Lor la nacionala elekto di 2017 lua nova partiso ganis du sidili en la Duesma Chambro; Baudet elektesis apud Theo Hiddema.

Baudet esas nacionala konservemo ed euroskeptiko, e favoras ekiro da Nederlando del Europana Uniono.  Il esas kontre nehabila enmigro aden Nederlando.  En diskurso il dicis ke enmigro produktas homeopatiala diluteso, ed en interviuvo il dicis ke il volas prezervar la indijena kulturi ed etnii di Europa.  Il opozas adhero da Ukraina al Europana Uniono.

En 2016 Forum voor Democratie establisis la Ukraina–plebicito kun la retosituo GeenStijl e Burgercomité EU; Baudet votis no.  En novembro 2016 Baudet kunsignatis letro iniciita dal germana jurnalisto Billy Six qua pregis Donald Trump demandar nova exploro pri Flugo MH17.

Baudet havas forta opiniono pri arti, la temo di lua libro Oikofobie, ed egardas ne-Westala arto e Westala pos-1900a modernismo en vidala arti kom inferiora kam Westala Realismo, kurajigas eduko pri tonala muziko opoze atona* muziko, e desprizas moderna pos-1950a arkitekturo. Baudet freque parolas pri la perceptata existo di "partiso-trusto", en qua la chefa partisi dividas povo inter su e konspiras vers la sama skopi.  Baudet ne esas religioza, ma il esas simpatioza a Kristana valori.  En interviuvo, il deskriptis su kom "agnostika kulturala Kristano."

Baudet esas adheranto dil konspiro-teorio 'Kulturala Marxismo', qua sugestas l'existo di kalkulita esforco destruktar westala kulturo per intelektala moyeni.  To supozeble atingesos per multakulturalismo, "politikala korekteso" e tolero vers homeosexualeso e trans-sexualeso.  Baudet akuzas la Europana Uniono pri esar 'Kulturala-Marxista projeto, kun la skopo destruktar Europana Civilizuro'.