Tiger Woods

De Wikipedio
Irez ad: pilotado, serchez
Tiger Woods en 2014

Eldrick Tont "Tiger" Woods (30ma decembro 1975) esas usana profesionala golfisto qua esas un ek la maxim sucesoza golfisti di omna tempo.

Il anke esis un ek la max alte-salariata atleti en la mondo dum plura yari.

Pos eminenta juniora, kolegio-, ed amatora karieri, Woods evis 20 yari kande il profesionaleskis ye la fino di somero 1996.  En aprilo 1997, il ja ganabis tri PGA-tur-eventi ultre la Masters di 1997.  Woods ganis ta turniro per 12 stroki, rekorda ludo pro qua il ganis $486.000.

Il unesme atingis numero un en la mondo-rangi en junio 1997, min kam yaro pos profesionaleskar.  Tra la 2000a yari, Woods dominacis golfo.  Il esis la unesme-rangizita golfisto en la mondo de agosto 1999 til septembro 2004 (264 semani) e de junio 2005 til oktobro 2010 (281 semani).

Pos ke Woods konfesis nefideleso, il retretis de profesionala golfo de decembro 2009 til aprilo 2010 por enfokigar sua personala vivo.  Malgre koncilio-probi, il e lua spozino Elin Nordegren fine divorcis.  Lua multa alegita extermariaja aferi revelesis da plura mulieri.  Lua golfo-ludo sufris, e lua rangizo gradope falis a baza nivelo No. 58 en novembro 2011.  Il finis sengana serio de 107 semani kande il triumfis che la Chevron World Challenge en decembro 2011.

Pos ganar la Arnold Palmer Invitational ye marto 25ma 2013, il ri-acensis a No.1, restinte ibe til mayo 2014.  Woods subisis dorso-kirurgio en aprilo 2014 e septembro 2015 e depose penis riganar sua dominacanta ludado.  En marto 2015, Woods falabis a No. 104, exter la supra 100 unesmafoye depos 1996.  En mayo 2016, Woods falis ek la mondala supra 500 unesmafoye en sua kariero.  En julio 2017, il rangizesis ye No. 1005, la maxim baza di sua kariero.  Il restabis ye numero un dum entote 683 semani, plu kam irga altra golfisto en historio.

Tiger Woods ludanta

Woods establisis multa golfo-rekordi.  Il esis mondala Numero Un dum la maxim multa intersequanta semani, e tota semani.  Il ganis la premio PGA Player of the Year dek-e-ok-foye.  Il ganis 14 profesionala golfo-konkursi, dop nur Jack Nicklaus kun 18, e 79 PGA-tur-eventi, dop nur Sam Snead kun 82.

Woods superesas omna aktiva golfisti segun kariero-gani e PGA-turo-gani.  Il esas la max yuna golfisto qua atingis la kariero-Grand Slam, e max yuna e rapida ganinto di 50 turo-turniri.  Pluse, Woods esas nur la duesma golfisto (pos Nicklaus) qua atingis kariero-Grand Slam trifoye.  Woods ganis 18 Mondo-Golfo-Championkonkursi.

Familio[redaktar | redaktar fonto]

Woods naskis en 1975 en Cypress, Kalifornia, ad Earl (1932-2006) e Kultida (Tida) Woods (n. 1944).  Il esas la unika filio di ta mariajo; tamen, il havas du mi-fratuli, Earl Jr. (n. 1955) e Kevin (n. 1957), e mi-fratino, Royce (n. 1958).

Kultida (n. Punsawad), originale de Tailando, havas mixita tailandana, chiniana, e nederlandana ancestri.  Earl, retretinta lietnanto-kolonelo e veterano di la Vietnam-Milito, esas di origino afrikana-usana kun poka europana.  La matro di Earl, Maude Carter havis hela pelo.  On sugestis posibla indijena usana e chiniana ancestri.  Tiger referas sua etniala kompozuro kom "Cablinasian" (silabala abreviuro inventita ek "kaukaziana" (blanka), negra, usana indijena, ed aziana).

Tiger Woods kun Barack Obama, 2009

Lua prenomo, Eldrick, inventesis da lua matro pro ke ol komencas per "E" (di Earl) e finas per "K" (di Kultida).  Lua meza nomo Tont esas tradicionala tailandana nomo.  Il nomizesis Tiger honore amiko di lua patro Kol. Vuong Dang Phong, qua anke konocesis kom Tiger.

Woods havas nevino, Cheyenne Woods, qua anke ludas golfo e profesionaleskis en 2012.

Frua vivo[redaktar | redaktar fonto]

Woods kreskis en Komtio Orange, Kalifornia.  Il introduktesis a golfo ante la evo du da sua patro, Earl Woods.  Earl esis amatora golfero.

En 1978, Tiger ludetis kontre komediisto Bob Hope che la televizion-programo The Mike Douglas Show.  Evinte kin, il aparis en Golf Digest e che la ABC-programo That's Incredible.  Evinte sis, Tiger ganis la konkurso por pueri di evo 10 di Drive, Pitch, and Putt, che Navy Golf Course en Cypress, Kalifornia.  En 1984 evinta ok, il ganis la konkurso por pueruli di evo 9–10 che la Junior World Golf Championships.

Lua patro Earl skribis ke Tiger unesme vinkis lu ye evo 11 yari, malgre maxima esforco da Earl.  Earl sempre vinkesis da Tiger pos lore.