Belmopan

De Wikipedio
Belmopan
Parlamento di Belize, en Belmopan.
Standardo
Lando: Belize
Informo:
Fondita ye: 1ma di agosto 1970
Latitudo: 17°15'05" N
Longitudo: 88°46'01" W
Altitudo: 76 m
Surfaco: 32.78 km²
Habitanti: 20 621 (2016)
Denseso di habitantaro: 500 hab./km²
Horala zono: UTC-6
Urbestro: Khalid Belisle (UDP)
Mapo di Belmopan
Oficala retosituo:
www.belmopancitycouncil.org
Katedralo di la Santa Redemtero.

Belmopan esas chef-urbo di Belize. Ol havis 16 451 habitanti en 2010,[1] ed esas la 3ma maxim populoza urbo di la lando. Ol ank esas la min populoza chef-urbo di Central Amerika.

Fondita kom projetita urbo en 1970, Belmopan esas un ek la maxim nova chef-urbi de la mondo. Depos la yaro 2000, ol esas un ek la du loki di Belizi qui oficale mencionesas kom urbo - l'altra esas Belize City.

Historio[redaktar | redaktar fonto]

Komence la chef-urbo di Belize esis Belize City, an la marbordo dil Karibiana Maro, nomizita segun la fluvio Belize. En oktobro 1961, l'uragano Hattie destruktis 75% de la domi e de komercal edifici di Belize City. Pos l'uragano, Belizeana guvernerio decidis konstruktar nova chef-urbo.

Ta nova chef-urbo mustis esar en bona tereno e havar vicina industriala zono. En 1962 kreesis komitato qua decidis konstruktar ol en loko nomizita Belmopan, cirkume 82 km weste de Belize City.

En 1964, lora chefa ministro George Cadle Price duktis delegaciono a London por demandar fundi por la konstruktado di la nova chef-urbo.[2] Quankam nekapabla por quik furnisar suficanta fundi por tala granda projeto, Britaniana guvernerio montris granda intereso, pro la logiko pri konstruktar la nova chef-urbo en regiono protektita de mareala ondi.

Parlamento di Belize, en Belmopan.

La nomo por la nova chef-urbo, Belmopan, originis de du vorti: "Belize" (nomo di la maxim granda fluvio di la lando) e "Mopan", nomo di rivero de la regiono qua debushas an fluvio Belize.[3] Komence, la budjeto por konstruktar la nova chef-urbo esis 40 milion Belizeana dolari (lor equivalanta a US$ 20 milioni). Nur la duimo esis disponebla, ma la momento ne povis perdesar.[4]

En 1967 la konstrukto komencis, e l'unesma parto dil urbo kompleteskis en 1970, po 25 milion Belizeana dolari. En 2000 eventis l'unesma elekto por lokala konsilantaro. Erste en februaro 2005 Usa, decidis tranferar lua ambasadeyo de Belize City a Belmopan. Altra landi, exemple Brazilia, Venezuela, Mexikia, Kosta Rika e Salvador, anke havas ambasadeyi en l'urbo, kontre ke Equador, Chili e Dominikana Republiko havas konsuleyi.

Geografio[redaktar | redaktar fonto]

Aeral imajo pri Belmopan.

Jacanta an altitudo di 76 metri, proxim la valo dil fluvio Belize e la naturala rezerveyo Mountain Pine Ridge, Belmopan distas 80 km de la litoro di Karibia per streta lineo. La temperaturo dil urbo varias de 18°C til 32°C dum la yaro. Someri esas kurta, varma ed ordinare nuboza. Lua klimato esas tropikala influata da musono (Aw segun la klimatala klasifikuro da Köppen). La pluvoza sezono duras de mayo til februaro, kun kurta sika periodo dum la cetera du monati. Tamen, pluvas mem dum sika monati, mezavalore 45 mm.

Referi[redaktar | redaktar fonto]

  1. Population Data - Census 2010 - Publikigita da Statistical Institute of Belize. URL vidita ye 27ma di februaro 2014. Idiomo: Angla.
  2. Exhibition highlights history of Belmopan - Dato di publikigo: 30ma di julio 2004. URL vidita ye 27ma di decembro 2013. Idiomo: Angla.
  3. Belmopan at Mybelizeadventure.com - URL vidita ye 25ma di januaro 2024. Idiomo: Angla.
  4. "Belmopan: Perspective on a New Capital", Kevin C. Kearns, Geographical Review, p. 153 (footnote #13), © 1973 American Geographical Society