Chicago

De Wikipedio
Chicago
Kelk imaji pri Chicago.
Standardo Blazono
Lando: Usa
Regiono: Illinois
Informo:
Latitudo: 41°50'13" N
Longitudo: 87°41'05" W
Altitudo: 181 m
Surfaco: 606 km²
Habitanti: 2 695 598 (2010)
Denseso di habitantaro: 4,447.4 hab./km²
Horala zono: UTC-6
(UTC-5 dum somero)
Urbestro: Brandon Johnson (D)
Mapo di Chicago
Oficala retosituo:
www.cityofchicago.org

Chicago esas la 3ma maxima grand urbo di Usa dop New York e Los Angeles, e la maxim granda dil stato Illinois. Segun la demografiala kontado di 2010 esis 2 695 598 habitanti.[1] Lua tota surfaco esas 606,2 km².

Historio[redaktar | redaktar fonto]

Dum la duimo dil 18ma yarcento la regiono habitesis dal indijeni Potawatomi. L'unesma permananta habitanto di la regiono qua ne esis indijeno esis Jean Baptiste Point du Sable. Du Sable decendis de Franci ed Afrikani, ed arivis dum la yari 1780a. En 1795, pos tale nomizita "Indijena milito dil Nord-westo", la regiono cedesis ad Usa dal indijeni.

Granda incendio di Chicago, 1871.

Ye la 8ma di oktobro 1871, grava fairo komencis. Ol duris til la 10ma di oktobro; cirkume 300 homi mortis, e 9 quadrato-kilometri de la urbo esis destruktata; ol nomizesis la Granda Fairo di Chicago. Plu kam 100.000 rezidanti esis sen-hema. La fairo esis difuzata pro sikeso pos periodo sen pluvo, e pro ke la plu multa de strukturi esis ligna. Pos la fairo, donacaji venis de individui, korporacioni e de altra urbi. Ri-konstruktado balde komencis.

Chicago kreskis rapide de 1851 til 1920, sive en quanto di habitanti, sive en surfaco totala, pro absorbo di vicina komoni. Lua kresko atraktis multa enmigranti de estal Usa e de Europa. En 1900, cirkume 77% de lua habitanti esis enmigranti o filii de enmigranti, nome Germani, Irlandani, Poloni, Suedi e Cheki, e 98,1% de la habitantaro esis blanki.

Laborala konflikti komencis pos la rapida expanso di industrii, ed eventis granda striki en 1886 ed en 1894, organizita da anarkiisti e socialisti. Dum la yari 1870a e 1880a, la sanesala e higienala substrukturi dil urbo plubonigesis, e lua legaro modifikesis por helpar kombatar epidemii di variolo, kolero e flava febro. Ca legaro pose divenis modelo por plubonigar sanesala sistemo en altra urbi.

Chicago gastigis l'Universala Expozo di 1893 en olima marsholando di South Side, en la nuna Parko Jackson. L'Universitato di Chicago, ante situita en altra loko, ank instalesis en Sout Side en 1892.

Dum l'unesma mondomilito e la yari 1920a, l'industrio expansis, ed atraktis multa negra laboristi de sudal Usa. Inter 1910 e 1930, la quanto di negra habitanti augmentis de 44 103 til 233 903.[2] Ca migrado afektis multe la kulturo dil urbo, nome lua arto, literaturo e muziko.

Referi[redaktar | redaktar fonto]

  1. Annual Estimates of the Resident Population for Incorporated Places Over 50,000, Ranked by July 1, 2012 Population: April 1, 2010 to July 1, 2012 - Publikigita da Usana Kontado-Ministerio. URL vidita ye 5ma di decembro 2013. 
  2. Martin, Elizabeth Anne:Detroit and the Great Migration, 1916-1929  Volumo: 40.  Publikigita da Bentley Historical Library Bulletin, University of Michigan.  Dato di publikigo: 1993.  URL vidita ye 5ma di decembro 2013.