- 30 po cento de 18–29 evanta simulas parolar per telefonilo pro ke evitez diskuto kun ula prezenta homo. Inter plu olda la procentala nombro esas 13. (Pew Internet & American Life Project, Washington, Usa.)
- 35 negativa efektin havas ula alkoholajo, exemple esvano, falo a meleo, duesmadiala nauzeo. Pozitiva efekti esis 14, inter altri plu bona kapableso jokar. (Studio da psikologi en l’Universitato di Washington, Usa.)
- 300 questionin questionas 2–10 yari evanta filio mezavalore de lua matro po dio. La maxim kurioza esas 4 yari evanta puerino, qua igas 390 questioni. (Internetala studio da Littlewoods.com de mil matri en marto 2013.)
- 580.000 US$ kustas taxiala permiso en Istanbul, Turkia. La preco triopleskis en 9 yari. Nun la taxiisti povas nur lokacar l’uzoyuri de la permisieri. (Bloomberg Businessweek, Nova York, marto 2013.)
- 630.000.000 adulti en mondo fantazias ekmigror de sua hemolando. La maxim populara emo esas Usa. Pri enmigro adibe fantazias exemple 19 milioni Chiniani e 13 milioni Nigeriania. (Studio inter 2010 e 2012 en 154 landi de 5 milioni homi.)
|
|
Eventi en historio
Ye 18 di mayo …
1152. Henrik duko di Normandia e komto di Anjou, mariajesis ad Eleanor di Aquitania, filiino di Guillaume 10ma duko di Aquitania. El antee esabis spozino di rejulo Louis 7ma di Francia; el divorcabis de il en marto di ca yaro. En 1154, ye la morto di Stephen di Anglia, Henrik divenis rejulo Henrik 2ma di Anglia. Dum sequanta yari il esforcis establisar sua autoritato sur sua heredita teritorii en Britania en Francia. Il mariajis sua filii a rejala familii di Europa, quo fortigis ilua influo. Ilua unesma filiulo Henrik rebeleskis pro la povo di sua patro; Eleanor, asociito di la rebeleso, enkarcerigesis en 1173 da sua spozo, ed esis ne tote libera mem pos ke filiulo Henrik mortis en 1183. Pos la morto di Henrik 2ma en 1189, Eleanor esis influiva dum la regni di sucedanta reji, elua filiuli Richard 1ma e John; el mortis en 1204.
1596. La Nederlandana exploristo Willem Barents departis de Vlieland, proxim Amsterdam, ye komenco di triesma expediciono vers la nord-esto, por trovar voyo norde de Siberia a la oriento. En la unesma voyajo di 1594 il atingis Novaya Zemlya (Nova-Lando), retrovenante pro glacio-monteti; voyajo di la sequanta yaro impedesis pro la glaciigita Kara-maro. En la expediciono di 1596, la du navi di Barents atingis la ne-konocata Spitsbergen-insulo ye 17 di junio. Ye 1 di julio, la du navi sequis separata voyi; la navo qua portis Barents, atinginte Novaya Zemlya ye 17 di julio, pose divenis kaptita en glacio, ed ibe la navo-trupo eventoze pasis la vintro. La navo ankore fixigite en la glacio ye la sequanta junio, la posvivanti, sufranta pro skorbuto, eskapis en du bateli; Barents mortis pos sep dii en batelo. Pos sep semani, la 12 posvivanti salvesis ye la Kola-peninsulo da Rusa komerco-navo.
1869. En Japonia, la republiko di Ezo, establisita kelka monati antee, cedis su a la Japoniana imperio. La nova republiko, en la norda insulo pose nomizita Hokkaido, esis establisata da admiralo Enomoto Takeaki, qua retretabis a ca insulo, kun parto di la militonavaro qua esabis vinkata en la Boshin-milito. Ye 27 di januaro la republiko asertis nedependeso. La organizado di la republiko fondesis sur ta di Usa. Ye la unesma elektado qua eventis en Japonia, Enomoto elektesis kom prezidanto. En mayo 1869 la Japoniana imperio sendis armeo e militara floto ad Ezo, e la republiko cedis su pos vinkeso ye la batalio di Hakodate. Pos periodo en karcero Enomoto divenis guvernala oficisto en Hokkaido en 1872.
|
.jpg)
