Armistead Maupin

De Wikipedio
Salti al navigilo Irez a serchilo
Armistead Maupin kun Christopher Turner en 2013

Armistead Jones Maupin, Jr. (mayo 13ma 1944) esas usana skribisto, konocata pro lua romano-serio Tales of the City, lokizita en San Francisco.

Maupin naskis en Washington D.C. a Diana Jane (Barton) ed Armistead Jones Maupin.  Kurte pose, la familio translojis a Nord-Karolina, ube il kreskis.  Segun Maupin il havis rakont-instinti depos ke il evis ok yari.  Il asistis la Universitato di Nord-Karolina en Chapel Hill, ube il experiencis jurnalismo per skribar por The Daily Tar Heel.  Pos ganar sua grado, Maupin komencis che lego-skolo ma plu tarde livis.

Maupin laboris che WRAL-TV (Kanalo 5) en Raleigh, kanalo lore jerita da futura senatano Jesse Helms.  Helms nominis Maupin por patriota premio, quon il ganis.  Maupin dicis ke il esis tipala konservemo e mem segregacisto lore ed admiris Helms, familio-amiko, kom "hero-figuro".  Pose il chanjis sua opinioni dramatale - "Me chanjis e lu ne" - e kondamnis Helms che parado di geya fiereso.  Maupin esas veterano dil Usana Mararmeo; il servis plura turi inkluzanta en Vietnam.

En 1971 Maupin ofresis rolo che la San Francisco-kontoro dil Associated Press en 1971.  Il dicis ke il savabis ke il esis geya depos puereso, ma ne sexuagis til ke il evis 26, e decidis "ekvenar" erste en 1974 kande il evis 30.  Samayare, il komencis serio quo divenis la romano-serio Tales of the City en jurnalo en Marin-komtio la Pacific Sun, e pose en la San Francisco Chronicle.

Tales of the City esas romano-serio, la unesma parti di qui editesis de agosto 8ma 1974 en The Pacific Sun, pose de 1976 en la San Francisco Chronicle, e pose en serio de libri da HarperCollins (lore Harper and Row).  La unesma romano, Tales of the City, editesis en 1978.  Kin plusa libri sequis en le 1980, fininta per la lasta libro, Sure of You, en 1989.

Sepesma romano en 2007, Michael Tolliver Lives, durigas la rakonto di ula karakteri.  Okesma libro, Mary Ann in Autumn, editesis en 2010 e nonesma e finala libro, The Days of Anna Madrigal, en 2014.  En Babycakes en 1983, Maupin esis un ek la unesma skribisti qui traktis la temo AIDS.  Pri la autobiografiala naturo dil karakteri, il dicas "Me sempre esis omna karaktero, ulsence."

La libri Tales of the City tradukesis aden dek lingui, e plu kam sis milion kopii imprimesis.  Plura libri brodkastesis che BBC Radio 4.

La unesma tri libri anke adaptesis aden tri televizion-serii kun steli Olympia Dukakis e Laura Linney.  La unesma brodkasto esis che la usana publika reto PBS; posa serii aparis che la usana kablo-kanalo Showtime.

Maupin skribis du romani, Maybe The Moon e The Night Listener, qui ne esas parto dil Tales-serio.  Maybe The Moon deskriptesas da Maupin kom 'parte autobiografiala', malgre ke la precipua karaktero esas femina heterosexuala juda nano.  La karaktero anke fondesis sur lua amiko Tamara De Treaux, elqua pleis E.T. en la filmo di 1982 E.T. the Extra-Terrestrial.

The Night Listener esas roman à clef, inspirita da lua experienci relate la mistifiko Anthony Godby Johnson.  Il dicas ke il volis krear psikologiala rakonto, kun autobiografiala elementi.  La temi inkluzas la fino di lua relato kun sua partenero e la relato kun sua patro.   Ol aparis en intereto, che Salon.com, ante libro-edito.  The Night Listener adaptesis aden filmo quo montresis che la Sundance Film-Festivalo en januaro 2006 ed editesis da Miramax dum la sequanta agosto.

Maupin esa mariajita a Christopher Turner.  Il vidis lu che rendevuo-situo e "chasis lu alonge Castro Street".  Maupin e Turner mariajesis en Vancouver, Kanada, ye februaro 18ma 2007.

La olima partenero di Maupin, Terry Anderson, esis aktivisto por geyala yuri, e kunskribis la filmo di The Night Listener.  Il habitis kun Maupin en San Francisco e Nov-Zelando.

Ian McKellen esas lua amiko e Christopher Isherwood esis amiko, ed influis lua skribado.

Maupin havas la sama avulo kam angla kantisto Sarah Jane Morris.  Il esas ateisto.

Il juas facar publika lekti di sua verki e registragis oli omna kom sonlibri.

En 2012 Maupin kompris la hemo di shu-desegnisti Lynne e Dennis Comeau en Tesuque, Nov-Mexikia.