Ed van der Elsken

De Wikipedio
Salti al navigilo Irez a serchilo
Ed van der Elsken en 1988

Eduard "Ed" van der Elsken (10ma di marto 1925 - 28ma di decembro 1990) esis nederlandana fotografisto e filmifisto.

Lua imajaro provizas omnadiala, intima ed autobiografiala perspektivi pri la Europana zeitgeist dum la periodo dil Duesma Mondo-Milito aden le 1970, en la domeni di amoro, sexuo, arto, muziko (aparte jazo), ed alternativa kulturo. Il deskriptis sua kamero kom ‘fanatika’, e dicis: "Me ne esas jurnalisto, objektala raportero, me esas viro kun prizi e desprizi".

Ed van der Elsken naskis ye marto 10ma, 1925 en Amsterdam, Nederlando. En 1937, dezirinte divenor skultisto, il lernis petro-masono che Van Tetterode Steenhouwerij en Amsterdam. Pos finar preliminara studii che la Instituut voor Kunstnijverheidsonderwijs, la preirinto dil Rietveld-Akademio il enregistragis (en 1944) en la profesionala skulto-programo, quon il abandonis por eskapar Nazi-laboro. Tayare, pos la Batalio di Arnhem il servis en esqado di bombo-eskarto ube il montresis Picture Post da Britaniana soldati. Pose, en 1947, il deskovris Naked City dal usana sensacionalista fotografisto Weegee. Ica renkontri inspiris lua intereso pri fotografado, tayare il vendis fotografuri e probis korespondo-kurso che la Fotovakschool en Den Haag, ma faliis la finala exameno. Il pose ganis membreso dil GKf (fotografisto-fako dil nederlandana federuro di praktikanti dil aplikata arti).

De 1950 til 1954 il habitis e laboris en Paris, ube il renkontris sua unesma spozino, la hungariana fotografisto Ata Kandó. En 1956 aparis lua unesma libro de fotografuri: amoro-naraco en Saint Germain des Prés en Paris, en quo il fotografis yuna bohemiani en la franca chefurbo, inter qui Vali Myers. Ica libro esis lua unesma suceso e pose sequis duadeko de tala libri.

Van der Elsken facis de 1959 til 1960 kun lua lora spozino Gerda van der Veen mondoturo, e pose en 1971 habiteskis Edam, Nederlando. De lore il duris voyajar, inter altra loki a Japonia. Van der Elsken aparte facinesis pri homi en diversa kulturi e cirkonstanci. Multa laboro da lu povas karakterizesar kom sociala fotografo. Il kunlaboris pri la internaciona fotolibro The Family of Man. En 1977 il editis la libro Eye love you, en quo il montris la koloroza latero di homi.

Van der Elsken esis anke aktiva filmifisto. Il facis sua unesma filmo en 1960. En 1963 il facis Welkom in het leven, lieve kleine, un ek la unesma filmi qui registragesis per shultrokamereto, kun sinkrona sono. En ca filmo Van der Elsken departis de la tradiciono ke filmifisto stacas 'nevideble' dop la camero. Lua filmifo-maniero, kun la persono dop la kamero kom partoprenanto, tre influis la televizion-facisti Hans Keller, Frans Bromet e Roelof Kiers. En 1971 il recevis pro De verliefde camera la premio Staatsprijs pri filmarto.