House-muziko
House (pronuncez hauz) esas muzikala jenro distingebla per repetanta ritmala bato konocata Angle kom four-on-the-floor ("quar-en-la-sulo"), ordinare pleata a 120 bati po minuto, kun forta influo de muzikala jenro Disco. House kreesis da disk-jokei e muzikala produktisti de Chicago, Illinois, Usa. Ol evolucionis dum la komenco e la duimo dil yari 1980a, kande disk-jokei komencis modifikar muziki Disco e kreis bati plu mekanikala.
House kreesis da disk-jokei e muzikala produktisti de Chicago, exemple Frankie Knuckles, Ron Hardy, Jesse Saunders, Chip E., Joe Smooth, Steve "Silk" Hurley, Farley "Jackmaster" Funk, Marshall Jefferson, Phuture, ed altri. La jenro expansesis internacione a London, e pose ank ad altra Usana urbi, exemple New-York e Miami, e fine divenis mondala fenomeno.
House influesis multe da pop-muziko, nome dance music. Ol enkorpigesis da artisti internacione populara, exemple Whitney Houston, Janet Jackson, Madonna, Pet Shop Boys, Kylie Minogue e Lady Gaga, ed anke produktis diversa internaciona sucesi, exemple kansono "Pump Up the Jam", dal grupo Technotronic, "French Kiss" da Lil Louis, "Show Me Love" da Robin S., e "Push the Feeling On" dal grupo Nightcrawlers.
Un ek la subjenri de House, nomizita Acid House definesas per stridanta soni di basa frequeso kreita kun muzikala sintezilo Roland TB-303. Acid Tracks, da grupo Phuture, judikesas kom l'unesma exemplero di muziko en stilo Acid House. House-muziko povis esar produktita en chipa e facile uzebla elektronala sintezili e perkutili, e to faciligis disk-jokei e nedependanta muzikala produktisti krear muziki. Multa disk-jokei fameskis dum house-epoko e duris produktar "ri-mixo" di muziki por pop-artisti. Multa muziki ordinare uzis mikra porcioni, konocata Angle kom samples de altra kansoni, naraci, sonal efekti, bruisi, audio* de cinematografuri, edc., mixita a la melodio kreita kun sintezili.
Origino di la nomo House
[redaktar | redaktar fonto]Libro publikigita en 2009 afirmas ke termino "House-muziko" originis de noktala klubo "Warehouse", qua existis de 1977 til 1982 en Chicago. Frequenteri di ta klubo esis precipue Afrikan-Usani geyi, qui prizis dansar kande Frankie Knuckles laboris ibe kom disk-jokeo. Frankie komencis mixar parti de diferanta muziki kande ilu sentis ke la quanto di diski quin ilu havis ne esis suficanta por lua laboro. Pos ke "Warehouse" klozesis en 1983, l'asistantaro iris ad altra klubo ube Knuckles laboris, nomizita "The Power House", pose rinomizita "The Power Plant" kande Ron Hardy komencis laborar ibe.
En 1985, Chip E. lansis kansono nomizita "It's House", qua helpis definar la nova muzikala stilo. Tamen, Chip E. dicis ke la termino House uzesis por irga muziko "simila a quin audesis en Warehouse". Komence, kansoni house havis pozitiva mesaji, ma parolis precipue por grupi judikita kom outsiders (diskriminacita o judikita kom inferiora): Afrikan-Usani, Latin-Amerikani, geyi. En noktala klubi, ta grupi povis dansar sen diskriminaco, en pozitiva atmosfero. Multa kansoni kurajigis individui a "liberigar su", e l'uzo di drogi stimulis "tranco"-efekti en individui. Kelka kansoni havis mesaji pri egaleso, uneso e libereso, exemple "Can You Feel It", dal grupo Fingers Inc., de Chicago.
House en Europana landi
[redaktar | redaktar fonto].jpg)
Dum la fino dil yari 1980a, Britaniana disk-jokeo Eddie Richards komencis plear house-diski che noktala klubo Clink Street, en London, exemple "Love Can't Turn Around", da Farley "Jackmaster" Funk, qua rangizesis 10ma en Britaniana radii. En 1987, lansesis "Pump Up The Volume", l'unesma granda komercala suceso House Britaniana.
House anke developesis en noktala klubi di Ibiza, Hispania. Malgre ke komence nula lokal artisti o produktisti aparis ibe, la laboro di lokala disk-jokei kreis dicernebla stilo surnomizita Balearic House. Alfredo Fiorito, disk-jokeo Arjentiniano de noktala klubo Amnesia, anke konocata kom DJ Alfredo, judikesas kom un ek la kreinti dil subjenro.
Dum la fino dil yari 1980a e komenco dil yari 1990a, Gianfranco Bortolotti, Italiana muzikala produktisto kreis diversa muzikala grupi e projeti, exemple Cappella, East Side Beat e 49ers. En 1988, Daniele Davoli, Valerio Semplici, e Mirko Limoni formacis grupo komence nomizita Starlight e lansis kansono "Numero Uno". Pose la grupo rinomizesis Black Box ed, en 1990, lansis "Ride On Time", kansono qua uzis vokali da kantistino Martha Wash, qua nulafoye mencionesis kom kantistino. Vice, en la video* di la kansono ed en prizentado, manekinino Katrin Quinol aparis doblanta la voco da Martha Wash.