Irez a kontenajo

Insulo Martín García

De Wikipedio
Aeral imajo pri Martín García.
Insuli Martín García e Timóteo Rodríguez.

Insulo Martín García (Hispane Isla Martín García) esas insulo che fluvio Plata qua apartenas ad Arjentinia, tamen ol jacas en Uruguayana teritorial aqui. L'insulo havas entote 1,84 km² e havas permananta habitantaro di cirkume 180 personi (50 familii). En Arjentinia, ol apartenas a provinco Buenos Aires, jacanta 33 kilometri norde de la portuo di Tigre.[1]

La sulo dil insulo havas rokoza origino, e lua maxim alta punto jacas 27 metri super la marala nivelo. Malgre mikra, l'insulo havas aerodromo, qua posibligas viziteri arivar ibe, ed anke portuo. L'insulo Timóteo Rodríguez, havanta sabloza origino ed olim vicina norde de Martín Garcia, gradope unionesis komplete ad ol pro depozo di sedimenti. Nun, existas ibe la singla "sika frontiero" inter Uruguay ed Arjentinia.

Kombato di Martín García.

Martín García deskovresis en 1516, dum l'expediciono di Juan Días de Solís, qua deskovris fluvio Plata. Ol nomizesis segun Martín García, butikisto dil expediciono. L'insulo uzesis kom karcero de 1765 til 1886, nam esus preske neposibla por ulu fugar natanta de ibe, pro la violentoza aquoflui. Depos la revoluciono di Mayo en 1810, dum tale nomizita kombato di Martín García en 1814, e dum la milito por nedependo di Uruguay eventis milital okupadi e navala batalii en lua vicineso.

Dum la 20ma yarcento, l'ex-prezidanti Arjentiniana Hipólito Yrigoyen, Marcelo Torcuato de Alvear, Juan Domingo Perón ed Arturo Frondizi restis enkarcerigita ibe dum kelka tempo. Dum la yari 1970a establisesis definitive ke la suvereneso sur Martín García esus Arjentiniana, tamen la teritoriala aqui vicina apartenus ad Uruguay. Nun, la precipua ekonomial agado dil insulo esas turismo e komerco di nutrivi e suveniri por turisti.

Referi[redaktar | redaktar fonto]

  1. Isla Martín García: datos para un viaje express - Publikigita da Descubrir Turismo. Idiomo: Hispana.