Konstantinoplo

De Wikipedio

Konstantinoplo esas l'anciena nomo dil urbo Istanbul, en Turkia. Ol nomesis pri imperiestro Konstantinus la 1ma. L' urbo obtenis la nuna nomo pos unesma mondomilito.

Historio[redaktar | redaktar fonto]

Ye la 18ma di januaro 532 en Konstantinoplo, grava tumulto (la Nika-tumulto) esis finigata. La tumulto komencis ye 13 di januaro en la hipodromo ube charo-konkursi eventis; la spektanti, qui kustumale esis di du opozanta grupi, cafoye unigite opozis la imperiestro Iustinianus, maledikante il pro alta imposti ed altra rankori; li omna klamis "Nika!" ("Vinko!") Retretinte de la hipodromo aden sua palaco, Iustinianus konsideris fugo, ma ilua spozino Theodora deskonsilis il. Dum kelka dii, granda parto di Konstantinoplo destruktesis. Trupi di Justinianus supresis la tumulto; cirkume 30 mil personi mortis. Justinianus pose duris kom imperiestro til morto en 565, evante 82 yari; dum ta periodo ilu direktis la rikonstruktado dil urbo, inkluzante la katedralo Hagia Sofia.

Ye la 5ma di mayo 553 apertesis la duesma Koncilo di Konstantinoplo, qua duris til la 2ma di junio, kunvokita da imperiestro Justinianus 1ma. La prezidanto di la kunveno esis Eutychius, patriarko di Konstantinoplo; la partoprenanta episkopi esis grandaparte de la esto. La kunveno esas konocata da plura eklezii kom la Kinesma Ekumenika Koncilo.

Ye la 26ma di oktobro 740, grava ter-tremo eventis ye la esta Mediteraneo, ed esis multa destrukturo di urbi en Grekia ed en Egiptia. En Konstantinoplo, la muri di la urbo esis domajata e multa de la precipua strukturi krulis; statuo di Constantinus 1ma, ye un de la pordegi di Konstantinoplo, falis. La populo di la urbo supozis ke la tertremo esis puniso pro lia peki. La kirko Hagia Sofia esis domajata; la strukturo pose esis reparata, e la arki suportanta la kupolo esis extensata aden barelo-vulti.

Ye la 5ma di oktobro 869, la quaresma Koncilo di Konstantinoplo komencis; ol duris til la 28ma di februaro 870. Ol kunvokesis da Bizancana imperiestro Basileios la 1ma di Bizanco e Papo Adrianus la 2ma. Asistanti inkluzis 102 episkopi, tri papala legati e quar patriarki. La koncilo kunvenis en dek kunsidi, e disdonis 27 kanoni. La koncilo riafirmis la decidi di la 2ma Koncilo di Nicaea, di 787, suportante ikoni e santa imaji; to sequis la interdikto di ikoni da Bizancana imperiestro Konstantinus la 5ma (qua regnis de 741 til 775).

Wikipedio
Wikipedio
Wikivortaro explikas
ca rubriko
en altra lingui: Konstantinoplo