Shablono:Eventi/25 di oktobro

De Wikipedio
Salti al navigilo Irez a serchilo
Venera 10
  • 1616. Nederlandana exploristo Dirk Hartog deskovris la westa litoro di Australia; il esis la duesma de Europa qua vizitis Australia (pos Willem Janszoon en 1606). Hartog esis employata da la Vereenigde Oost-Indische Compagnie (VOC) di Nederlando; voyajanta de Sudafrika vers Jakarta, ilua voyo deviacis ed il arivis ye la nuntempa Shark Bay en Westa Australia. Dum tri dii il exploris la marbordo e jacanta insuli. Ye departo il fixigis stan-aloya plado, kun engraburo registranta ilua vizito, an fosto. En 1696, Nederlandana exploristo Willem de Vlamingh remplasis ca plado, quan il portis ad Amsterdam, ube ol nuntempe restas en muzeo.
  • 1838. En Paris, la kompozisto Georges Bizet naskis. Il havis intereso pri muziko de frua evo, e studiis ye la Konservatorio di Paris de 1848; en 1857 il grantesis la Prix de Rome, ed il rezidis en Roma de 1858 til 1860. Il kompozis plura operi, de qui la lasta esis Carmen, unesmafoye pleata ye l'Opéra-Comique ye 3 di marto 1875. Frua opinioni di la opera esis desbona, quo detrimentis ilua saneso; il mortis en junio di ta yaro, ante la plu tarda suceso di Carmen.
  • 1975. Venera 10, kosmosondilo di USSR, lansita ye 14 di junio 1975, atingis la surfaco di Venuso, tri dii pos la arivo sur la planeto di Venera 9 ye loko 2200 km distanta. Ol esis sama mashino kam Venera 9 e, quale ta sondilo, ol mezuris temperaturo ed atmosferala preso, ed ol prenis fotografuri di la surfaco, qua montris plata lava-roki. Ol funcionis dum 65 minuti pos arivo, quo posibligesis per koldigo-sistemo qua kompensis la alta temperaturo en la atmosfero.